უკრაინის ვიცე-პრემიერ მინისტრი სერგეი ტიგიპკო საქართველოში განხორციელებულ რეფორმებს წარმატებულად აფასებს.
როგორც თბილისში ვიზიტით მყოფმა ტიგიპკომ სასტუმრო "რედისონში" მიმდინარე კონფერენციის დაწყების წინ ჟურნალისტებს განუცხადა, უკრაინა საქართველოს გამოცდილებას სამშენებლო სფეროს რეფორმირების კუთხით გაეცნო.
"უკრაინა სწავლობს სხვადასხვა ქვეყნის გამოცდილებას. ჩვენ გავეცანით საქართველოს გამოცდილებასაც სამშენებლო სფეროს რეფორმირების კუთხით. მივიწვიეთ ორი კონსულტატი და ვიმუშავეთ ამ სფეროში უკანასკნელი ორი თვის განმავლობაში. შედეგად Dშემუშავდა კანონპროექტი, რომელსაც დღეს მინისტრთა კაბინეტი განიხილავს და უმაღლეს რადას გადაუგზავნის. პარლამენტის მიერ აღნიშნული კანონპროექტის დამტკიცების შემთხვევაში, მშენებლობის დაწყებისთვის საჭირო პროცედურებს 93-დან 23-მდე შევამცირებთ", - აღნიშნა ტიგიპკომ.
მისივე თქმით, უკრაინა სწავლობს საქართველოს გამოცდილებას საგადასახადო რეფორმირების კუთხითაც და გეგმავს შესაბამისი სფეროს კონსულტანტების მიწვევას.
შეგახსენებთ, რომ უკრაინის ვიცე-პრემიერი თბილისში წუხელ ჩამოვიდა. ის ამ წუთებში საქართველოს, ევროპისა და ცენტრალური აზიის ქვეყნებში სამეწარმეო გარემოს გაუმჯობესების სფეროში განხორციელებული რეფორმების თემაზე, სასტუმრო "რედისონში" მიმდინარე კონფერენციას ესწრება.
