მსოფლიოში ერთ-ერთი უმდიდრესი მონარქი, არაბეთის გაერთიანებული საამიროების პრეზიდენტი, შეიხ ხალიფა ბინ ზაიდ ალ-ნაჰიანი 73 წლის ასაკში გარდაიცვალა.
შეიხ ხალიფა არაბეთის გაერთიანებული საამიროების პრეზიდენტი იყო 2004 წლიდან. 2014 წელს გადატანილი ინსულტის შემდეგ, იგი ფაქტობრივად ჩამოშორებული იყო სახელმწიფო საქმეებს, თუმც კი ფორმალურად ინარჩუნებდა მამისგან მემკვიდრეობით მიღებულ პრეზიდენტის თანამდებობას.
ითვლება, რომ ალ-ნაჰიანების ოჯახი დაახლოებით 150 მილიარდი დოლარის ქონებას ფლობს.
შეიხ ხალიფა ბინ ზაიდ ალ-ნაჰიანი ასევე იყო აბუ-დაბის საამიროს მმართველი.
საპრეზიდენტო საქმეთა სამინისტროს განკარგულებით ქვეყანაში 40-დღიანი გლოვა გამოცხადდა, პირველი სამი დღის განმავლობაში კი შეჩერდება სამუშაო პროცესი საჯარო და კერძო სექტორში.
პრეზიდენტის მოვალეობას არაბეთის გაერთიანებული საამიროების ვიცე-პრეზიდენტი და დუბაის საამიროს მმართველი მოჰამედ ბინ რაშიდ ალ მაკტუმი შეასრულებს.
ფედერალური საბჭო, რომელიც შვიდი საამიროს მმართველებს აერთიანებს, 30 დღის განმავლობაში უნდა შეიკრიბოს ახალი პრეზიდენტის ასარჩევად.