რუსეთის პრეზიდენტმა ვლადიმირ პუტინმა ბოდიში მოიხადა სერგეი ლავროვის განცხადების გამო, როდესაც მან თქვა, რომ "ჰიტლერსაც ებრაული სისხლი ჰქონდა". იტყობინება BBC ისრაელის პრემიერ-მინისტრ ნაფტალი ბენეტის ოფისზე დაყრდნობით.
ნაფტალი ბენეტის ოფისმა განაცხადა, რომ პუტინმა ბოდიში ნაფტალი ბენეტთან საუბრისას მოიხადა და ისრაელის პრემიერ-მინისტრმაც მიიღო.
ორი ქვეყნის ლიდერის საუბრის შესახებ კრემლის მიერ გავრცელებულ პრესრელიზში ბოდიშთან დაკავშირებით არაფერია ნათქვამი.
შეგახსენებთ, რუსეთის საგარეო საქმეთა მინისტრმა სერგეი ლავროვმა იტალიურ მედიასთან ინტერვიუში, ვოლოდიმირ ზელენსკის კრიტიკისას, განაცხადა, რომ ადოლფ "ჰიტლერსაც ებრაული სისხლი ჰქონდა, ყველაზე მგზნებარე ანტისემიტები კი როგორც წესი, ებრაელები იყვნენ".
"ის [ზელენსკი] იგონებს არგუმენტს: როგორი ნაციფიკაცია შეიძლება მოხდეს მათთან, როდესაც ის ებრაელია. შეიძლება ვცდები, მაგრამ ჰიტლერსაც ებრაული სისხლი ჰქონდა, ეს აბსოლუტურად არაფერს ნიშნავს. ბრძენი ებრაელი ხალხი ამბობს, რომ ყველაზე მგზნებარე ანტისემიტები, როგორც წესი, ებრაელები არიან", - განაცხადა მან.
ისრაელი განარისხა რუსეთის საგარეო საქმეთა მინისტრის სერგეი ლავროვის კომენტარმა ჰიტლერის ებრაულ წარმომავლობასთან დაკავშირებით.
ლავროვის განცხადების გამო ახსნა-განმარტებებისთვის, რუსეთის ელჩი ისრაელის საგარეო საქმეთა სამინისტროში დაიბარეს.
ისრაელის საგარეო საქმეთა მინისტრმა იაირ ლაპიდმა ლავროვის განცხადებას აღმაშფოთებელი და მიუტევებელი უწოდა. ამასთან, ისრაელმა მოსკოვისგან ბოდიშის მოხდა მოითხოვა.
