საპარლამენტო დელეგაცია შალვა პაპუაშვილის ხელმძღვანელობით, უკრაინაში დღეს გაემგზავრება. ინფორმაციას ადასტურებენ უმრავლესობის წევრი ბექა ოდიშარია და ვიცე-სპიკერი ლევან იოსელიანი.
ოდიშარიას ინფორმაციით, გამგზავრებასთან დაკავშირებულ ტექნიკურ საკითხებზე, დეპუტატები პარლამენტის თავმჯდომარის კაბინეტში არიან შეკრებილები.
ლევან იოსელიანის განცხადებით, კი უკრაინაში ვიზიტი იქნება შემობრუნების წერტილი იმ ძალიან დაბალ ნიშნულზე მყოფი ქართულ-უკრაინული ურთიერთობების, რომელიც დღეს არსებობს.
"ძალიან მნიშვნელოვანია, რომ ეს ვიზიტი შედგება. ჩვენ დღეს მივემგზავრებით უკრაინაში და ეს იქნება შემობრუნების წერტილი იმ ძალიან დაბალ ნიშნულზე მყოფი ქართულ-უკრაინული ურთიერთობების, რომელიც დღეს არსებობს. ელჩიც გაწვეულია საქართველოდან და ამ გაფუჭებულ ურთიერთობებს ნამდვილად შველა სჭირდება. ეს ვიზიტი იქნება შესაძლებლობა, რომ ეს ურთიერთობები ჩადგეს იმ კალაპოტში, რასაც იმსახურებს ქართველი და უკრაინელი ხალხი. განსაკუთრებული ურთიერთობაა ხალხს შორის და ვხედავთ პოლიტიკურ დონეზე როგორ არის ყველაფერი გაფუჭებული", - განაცხადა იოსელიანმა.
საპარლამენტო დელეგაციაში შედიან შალვა პაპუაშვილი, დავით სერგეენკო, არჩილ თალაკვაძე, ლევან იოსელიანი, ანა ნაცვლიშვილი, ვახტანგ მეგრელიშვილი, ხათუნა სამნიძე და გიორგი ხოჯევანიშვილი.
