ლევან გაჩეჩილაძეს თბილისის მერობასთან დაკავშირებით კონკრეტული პოზიცია არ გააჩნია. ამის შესახებ, მან დღეს კონსერვატიული პარტიის პრეზენტაციის დაწყებამდე, ჟურნალისტებს განუცხადა.
"თამამად შემიძლია განვაცხადო, რომ ხელისუფლებაზე მეტი პრობლემა ოპოზიციას აქვს. დავაკვირდები მოვლენების განვითარებას", - აღნიშნა ლევან გაჩეჩილაძემ.
თუმცა თავის სიტყვაში, რომელიც მან დარბაზის წინ წარმსოთქვა, უკვე "ძალა ერთობაშია" ლოზუნგით წარსდგა.
"ოპოზიცია შემართულია გამარჯვებისკენ, ჩვენ რთული გზა გავიარეთ, ბევრი სისხლიც დაიღვარა, თუმცა დადგა გამარჯვების დრო, გამარჯვება კი ერთიანობის გარეშე შეუძლებელია - ძალა ერთობაშია" - განაცხადა გაჩეჩილაძემ.
შეგახსენებთ, რომ ოპოზიციური პარტიების წინასწარი არჩევნები იგივე პრაიმერი თებერვალში გაიმართება. წინასწარი ინფორმაციით, მასში მონაწილეობას კობა დავითაშვილსა და კონსერვატორ ზვიად ძიძიგურთან ერთად ირაკლი ალასანიაც მიიღებს.
