თვითგამოცხადებული დონეცკის სახალხო რესპუბლიკის ლიდერის დენის პუშლინის განცხადებით, უკრაინის მხრიდან მოსალოდნელი თავდასმის გამო, იწყებს მოსახლეობის ევაკუაციას რუსეთის ტერიტორიაზე.
პუშლინმა გამოაქვეყნა მოსახლოებისადმი მიმართვა, სადაც აღნიშნულია, რომ რუსეთის ხელმძღვანელობასთან შეთანხმებით, როსტოვის რეგიონი მზად არის მოქალაქეთა მისაღებად.
მისი თქმით, ევაკუაციას, უპირველესად, ქალებს, ბავშვებსა და მოხუცებს შესთავაზებენ.
რუსული სააგენტობის ინფორმაციით, ათიათასობით ადამიანის ევაკუაცია იგეგმება.
მალევე გავრცელდა ინფორმაცია, რომ მოქალაქეებს რუსეთში ევაკუაციისკენ მოუწოდა ლუგანსკელი სეპარატისტების ლიდერმა, ლეონიდ პასეჩნიკმაც.
ბოლო დღეებია, უკრაინის ხელისუფლება რუსეთის მიერ მხარდაჭერილი სეპარატისტული რეგიონების მხრიდან ცეცხლის შეწყვეტის აქტიური დარღვევის შესახებ იტყობინება.
უკრაინის თავდაცვის მინისტრმა ოლექსი რეზნიკოვმა პარასკევს უმაღლესი რადას სხდომაზე განაცხადა, რომ გასული დღის განმავლობაში, სეპარატისტებმა ცეცხლის შეწყვეტის შეთანხმება 60-ჯერ დაარღვის, მისი თქმით, უკრაინელმა სამხედროებმა მინსკის შეთანხმებით აკრძალული იარაღის გამოყენების 43 შემთხვევა აღრიცხეს.
რეზნიკოვის განცხადებით, რუსეთს მიერ მხარდაჭერილმა სეპარატისტებმა ცეცხლი გახსნეს კიევის კონტროლს დაქვემდებარებულ ტერიტორიაზე არსებული 30 დასახლებული პუნქტის მისამართით. მისივე თქმით, შედეგად ერთი ჯარისკაცი დაიჭრა, დაშავდა ასევე ერთი ჯარისკაცი და ორი მშვიდობიანი მოქალაქე.
პარალელურად, შეერთებული შტატები იუწყება, რომ რუსეთი შესაძლოა გეგმავდეს პროვოკაციულ ოპერაციებს, რათა გაამართლოს უკრაინაში სამხედრო ინტერვენცია.
