გერმანიის მედიამარეგულირებელმა ქვეყანაში რუსეთის გერმანულენოვანი ტელეარხის RT DE-ს მაუწყებლობა აკრძალა. მედიამარეგულირებლის განცხადებით, რუსულ ტელეარხს გერმანიაში ტრანსლირების ლიცენზია არ ჰქონდა.

1-ლი თებერვლიდან გერმანიაში არხის ნებისმიერი პროგრამის ტრანსლაცია და გავრცელება აიკრძალა. ეს ეხება მათ შორის თანამგზავრულ და ონლაინმაუწყებლობასაც.

გერმანიის მედიამარეგულირებელი აცხადებს, რომ RT-ს გერმანულენოვანი პროგრამების შინაარსზე სამართლებრივი პასუხისმგებლობა ეკისრება ბერლინში განთავსებულ მედიაკომპანია RT DE Productions GmbH-ს.

RT-სა და RT DE Productions-ის ხელმძღვანელები ამტკიცებენ, რომ საპროდიუსერო კომპანიას არ ეკისრება პასუხისმგებლობა RT DE-ს მაუწყებლობაზე, რომელიც მათი თქმით, მოსკოვშია ბაზირებული.

RT-ს მთავარმა რედაქტორმა მარგარიტა სიმონიანმა Telegram-ზე დაწერა, რომ RT DE მაუწყებლობას არ შეწყვეტს, RT DE Productions-ის ხელმძღვანელმა დინარა ტოქსუნოვამ კი განაცხადა, რომ გერმანიის მედიამარეგულირებლის გადაწყვეტილებას სასამრთლოში გაასაჩივრებენ.

რუსეთის საგარეო საქმეთა სამინისტრო მყისიერად გამოეხმაურა გერმანიის მარეგულირებლის გადაწყვეტილებას და განაცხადა, რომ მიიღებს საპასუხო ზომებს.