საქართველოს პრემიერ-მინისტრი ნიკა გილაური თემურ იაკობაშვილს რეინტეგრაციის საკითხებში სახელმწიფო მინისტრის პოსტზე გაწეული მუშაობისთვის მადობას უხდის.
"მნიშვნელოვანი დოკუმენტი იქნა შედგენილი თემურ იაკობაშვილის რეინტეგრაციის საკითხებში სახელმწიფო მინისტრად მუშაობის დროს. ეს არის ოკუპირებულ ტერიტორიებთან მიმართებაში საქართველოს სახელმწიფო სტრატეგია, რომელიც ბევრმა ქვეყანამ მოიწონა. ეს არის სტრატეგია, რომელსაც ჩვენ თემურის სხვა თანამდებობაზე გადასვლის შემდეგაც განვახორციელებთ. მინდა წარმატება ვუსურვო მას", - განაცხადა ნიკა გილაურმა მთავრობის დღევანდელ სხდომაზე.
მისივე შეფასებით, იაკობაშვილის საქმიანობა საკმაოდ საინტერესო და მნიშვნელოვანი იყო.
შეგახსენებთ, რომ რეინტეგრაციის საკითხებში უკვე ყოფილი სახელმწიფო მინისტრი თემურ იაკობაშვილი აშშ-ში საქართველოს ელჩად ინიშნება. მის ადგილს კი ამ პოსტზე უშიშროების საბჭოს ექს მდივანი ეკა ტყეშელაშვილი დაიკავებს.
