შეერთებული შტატების უზენაესმა სასამართლომ დაბლოკა პრეზიდენტ ბაიდენის განკარგულება, რომელიც საშუალო და მსხვილი კომპანიებისთვის თანამშრომელთა სავალდებულო ვაქცინაციას ან კოვიდ-19-ზე ტესტირებას ითვალისწინებდა.
სავალდებულო ვაქცინაციის მოთხოვნა კვლავ შენარჩუნდება იმ სამედიცინო მუშაკებისთვის, რომლებიც ფედერალური ბიუჯეტიდან დაფინანსებულ სამედიცინო დაწესებულებებში მუშაობენ.
პრეზიდენტ ბაიდენის განკარგულება გასული წლის ნოემბერში გაასაჩივრა მოსარჩელეთა ჯგუფმა, რომელშიც შედიოდნენ ოჰაიოს შტატი და დამოუკიდებელი ბიზნესის ეროვნული ფედერაცია.
როგორც "ამერიკის ხმა" იტყობინებოდა, უზენაესმა სასამართლომ მხარეთა არგუმენტები 7 იანვარს მოისმინა. განკარგულების დაბლოკვას ხმა მისცა ექვსმა მოსამართლემ, რომლებიც კონსერვატორ მოსამართლეებად მიიჩნევიან, ხოლო სასამართლოს ლიბერალურმა ფრთამ, რომელიც სამი მოსამართლისგან შედგება, ხმა დაბლოკვის წინააღმდეგ მისცა.
ვაქცინაციის სავალდებულო მოთხოვნები ჯანდაცვის მუშაკებისთვის, მათ შორის საავადმყოფოებსა და მოხუცთა სახლებში მომუშავე პერსონალისთვის, რომლებიც დაფინანსებას იღებენ ჯანმრთელობის სახელმწიფო პროგრამებიდან Medicare და Medicaid, ძალაში დარჩა.
მანამდე, საქმე განიხილა აშშ-ის სააპელაციო სასამართლომ, რომელმაც დროებით შეაჩერა პრეზიდენტ ჯო ბაიდენის განკარგულება, რომელიც მსხვილ კომპანიებს ავალდებულებდა თანამშრომლების COVID-19-ის ვაქცინაციას.
კანონი იანვრიდან უნდა შესულიყო ძალაში.
საჯარო მოხელეთა სავალდებულო ვაქცინაციის შესახებ განკარგულება ჯო ბაიდენმა გასული წლის სექტემბერში გამოსცა.
განკარგულების თანახმად, შეერთებულ შტატებში მოქმედი ყველა კომპანია, რომელსაც 100-ზე მეტი თანამშრომელი ჰყავს, ვალდებული იყო, უზრუნველეყო დასაქმებულთა ვაქცინაცია ან კვირაში ერთხელ კოვიდტესტის ჩატარება. მოთხოვნის შეუსრულებლობის შემთხვევაში, კომპანიებისთვის გათვალისწინებული იყო სოლიდური ფულადი ჯარიმები.
პრეზიდენტის ოპონენტებმა რესპუბლიკური პარტიიდან დაგმეს ვაქცინაციის სავალდებულოობა და ბაიდენი დისკრიმინაციასა და უფლებამოსილების გადაჭარბებაში დაადანაშაულეს.