ამ კვირაში შეერთებული შტატებისა და მისი მოკავშირეების რუსეთთან მიმდინარე მოლაპარაკებების ფონზე, ამერიკელ სენატორთა ჯგუფი შეერთებული შტატების პრეზიდენტ ჯო ბაიდენს ერთობლივი განცხადებით მიმართავს.
სენატორები მტკიცე მხარდაჭერას გამოხატავენ აღმოსავლეთ ევროპელი პარტნიორების, მათ შორის, საქართველოსა და უკრაინის მიმართ.
განცხადებაში ამერიკელი კანონმდებლობი აღნიშნავენ, რომ რუსეთს არ აქვს ვეტოს უფლება ჩრდილოატალანტიკური ალიანსის გაფართოებაზე.
"მიმდინარე კრიზისი, რომელიც ვლადიმირ პუტინის მიერ უკრაინის საზღვრებთან რუსული სამხედრო ძალების კონცენტრაციით, ხელოვნურად არის შექმნილი, გამოხატავს პუტინის უარს, პატივი სცეს მისი მეზობლების ტერიტორიულ მთლიანობასა და სუვერენიტეტს.
ამ წერილზე ხელმომწერი სენატორები მხარს ვუჭერთ თქვენს ძალისხმევას, გამოიყენოთ ყველა დიპლომატიური შესაძლებლობა, რათა ნათლად აჩვენოთ პუტინს, რომ შეერთებული შტატები და მისი მოკავშირეები არ მიიღებენ უკრაინის მიმართ მიმდინარე აგრესიას, ისევე როგორც უკრაინაში შეჭრას, მძიმე შედეგების გარეშე.
"უსაფრთხოების გარანტიების" შესახებ წინადადებაში, რომლითაც რუსეთმა დასავლეთის მთავრობებს მიმართა, პუტინი ცალსახად ითხოვს, რომ უკრაინას უარი ეთქვას ნატო-ში გაწევრიანებზე და ალიანსმა შეწყვიტოს შემდგომი გაფართოება. პუტინი ასევე ითხოვს, რომ ნატო-მ უარი თქვას სამხედრო ტექნიკის განლაგებაზე იმ ქვეყნებში, რომლებიც ალიანსს 1997 წლის შემდეგ შეუერთდნენ. ეს და სხვა არაგონივრული მოთხოვნები სენატორთა ჯგუფისთვის მიუღებელია.
რუსეთის ეს მოთხოვნები არის მისი მცდელობის ნაწილი, ევროპაში ხელახლა შექმნას რუსული გავლენის სფეროები, სადაც კრემლს თავისუფლად ძალუძს ზეწოლა მოახდინოს და დააშინოს ისეთი ქვეყნები, როგორებიცაა უკრაინა, საქართველო, მოლდოვა, ლატვია, ლიეტუვა, პოლონეთი და რუმინეთი, რომლები ამერიკის მტკიცე პარტნიორები და მოკავშირეები არიან.
ჩვენ მხარს ვუჭერთ ჩვენსა მოკავშირეებთან მჭიდრო თანამშრომლობას, რათა უზრუნველვყოთ კოორდინირებული და ცალსახა პასუხი პუტინის ქმედებების მიმართ. ვთხოვთ, აშშ-ის ადმინისტრაციასა და მის მოკავშირეებს, განაგრძონ ჩვენი მოკავშირეების წინააღმდეგ პუტინის სამხედრო მუქარისა და პროვოკაციის მკაცრი დაგმობა.
აუცილებელია, რომ შეერთებულმა შტატებმა მოახდინოს მტკიცე გადაწყვეტილების დემონსტრირება და უარყოს პუტინის მიუღებელი მოთხოვნები.
მიმდინარე კვირაში რუსეთთან მოლაპარაკებების ფონზე, გვსურს, ხაზი გავუსვათ ჩვენს მტკიცე ორპარტიულ მხარდაჭერას შემდეგი პუნქტებისადმი:
• რუსეთს არ აქვს ვეტოს უფლება ჩრდილოატალანტიკური ალიანსის გაფართოებაზე. ამას მხოლოდ ნატო-ს წევრები გადაწყვეტენ;
• აშშ, მისი მოკავშირეები და პარტნიორები მხარს უჭერენ პრინციპს, რომ „უკრაინის საკითხზე გადაწყვეტილება ან დისკუსია არ შედეგება უკრაინის გარეშე. ეს ასევე უნდა გავრცელდეს საქართველოზეც;
• ნატო-ს კარი ღია რჩება იმ ევროპული ქვეყნებისთვის, რომლებიც მზად არიან და სურთ, შეასრულონ ნატო-ს წევრობის ვალდებულებები და, რომელთა წევრობასაც წვლილი შეაქვს ევროატლანტიკური სივრცის უსაფრთხოებაში;
• ნატო-მ მხედველობაში უნდა მიიღოს ალიანსის აღმოსავლეთ ნაწილში გაზრდილი სამხედრო განლაგება, მათ შორის ბალტიისპირეთის ქვეყნებში, პოლონეთსა და შავი ზღვის რეგიონში, რუსული აგრესიის შესაკავებლად;
• საჭიროა, დამატებითი დახმარება უსაფრთხოების სფეროში უკრაინისთვის და აღმოსავლეთ ევროპის ქვეყნებისთვის, რომლებიც რუსული აგრესიის საფრთხის ქვეშ არიან, რათა რუსეთს სამხედრო ოპერაციებში ხელი შეეშალოთ. ჩვენმა მოკავშირეებმა უნდა განიხილონ მსგავსი ზომები;
• აშშ-მა და მისმა მოკავშირეებმა უნდა დაუწესონ სანქციები პუტინს და მის გარემოცვას, ვიდრე რუსეთი კვლავ ემუქრება აღმოსავლეთ ევროპის ქვეყნების უსაფრთხოებას.
მხარს ვუჭერთ ჩვენს მოკავშირეებთან მუშაობას, განსაკუთრებით ნატო-სა და ევროკავშირში, რათა უკან დაიხიოს პუტინის აგრესიულმა ტაქტიკამ და ვაჩვენოთ შეერთებული შტატების ერთგულება ევროპაში წესებზე დამყარებული წესრიგის შენარჩუნების მიმართ.
სამყარო, სადაც ავტორიტარებს სჯერათ, რომ გზის გაკვალვა იძულებისა და დაშინების წყალობით ძალუძთ, საფრთეს უქმნის ამერიკელთა უსაფრთხოებას საზღვარგარეთ და მათ კეთილდღეობას შინ", - ნათქვამია სენატორების წერილში, რომელსაც ხელს აწერენ:
მარკო რუბიო
ჯინ შაჰინი
ტომ ტილისი
კრისტოფერ კუსნი
ჯონი ერნსტი
ჯეფრი მაკლი;
მაიკლ რაუნდსი;
კორი ბუკერი;
ჯონ ბარასო.