ყაზახეთის პრეზიდენტმა ყასიმ ჟომართ-თოყაევმა ქვეყანაში კოლექტიური უსაფრთხოების ხელშეკრულების ორგანიზაციის (ОДКБ) „სამშვიდობო მისიის“ დასრულება გამოაცხადა.

თოყაევის განცხადებით, ОДКБ-ის სამხედრო კონტინგენტის გაყვანა ყაზახეთიდან ორ დღეში დაიწყება. 

მისივე თქმით, კონტინგენტის სრულად გაყვანის პროცესს დაახლოებით 10 დღე დასჭირდება.

ამავდროულად, თოყაევმა ყაზახეთის მთვრობის ახალი მეთაური, ალიხან სმაილოვი წარადგინა. სმაილოვი 2020 წლის მაისიდან ვიცე-პრემიერის მოვალეობას ასრუელებდა. ყაზახეთის პარლამენტმა ალიხან სმაილოვი პრემიერ-მინისტრად უკვე დაამტკიცა.

თოყაევმა ახალ პრემიერ-მინისტრს დაავალა, მომდევნო 3 კვირის განმავლობაში წარადგინოს სამთავრობო პროგრამა. პრეზიდენტმა აღნიშნა, რომ სამთავრობო პროგრამაში აუცილებელია გათვალისწინებული იყოს სახელმწიფო მმართველობის სისტემის რეფორმა და ხელისუფლებასა და მოქალაქეებს შორის დიალოგის ეფექტურობის გაზრდა.

ყაზახეთი პოლიტიკური რეფორმების დაწყების პირობას თოყაევი მანამდეც დებდა.

ყაზახეთის შინაგან საქმეთა სამინისტროს ინფორმაციით, ქვეყანაში არეულობის დროს, დააკავეს თითქმის 10 000 ადამიანი.

ყაზახეთში გათხევადებული აირის ფასის გაძვირების გამო საპროტესტო აქციები 2 იანვარს დაიწყო. პროტესტის ეპიცენტრი ქვეყნის უდიდეს ქალაქი ალმათი იყო. საპროტესტო აქციების დასრულების მიზნით, თოყაევმა გადააყენა მთავრობა ასკარ მამინის მეთაურობით და უშიშროების საბჭოს თავად ჩაუდგა სათავეში, რომელსაც უწინ ნურსულთან ნაზარბაევი ხელმძღვანელობდა. 

ქვეყნის მასშტაბით საგანგებო მდგომარეობა გამოცხადდა. თოყაევმა კოლექტიური უსაფრთხოების ხელშეკრულების ორგანიზაციას დახმარების თხოვნით მიმართა, საპასუხოდ, ქვეყანაში სამხედრო კონტინგენტი გაიგზავნა.