ჟენევაში შეერთებული შტატებისა და რუსეთის დელეგაციების, "სტრატეგიისა და უსაფრთხოების საკითხებზე" დიალოგის ფარგლებში, მოლაპარაკებები დასრულდა, ინფორმაციას სახელმწიფო დეპარტამენტზე დაყრდნობით Reuters-ი ავრცელებს.
მოლაპარაკებები გაეროს ჟენევის ოფისში, აშშ-ის მუდმივ წარმომადგენლობაში პრესისთვის დახურულ ფორმატში გაიმართა და შვიდ საათზე მეტ ხანს გაგრძელდა.
მოლაპარაკებებზე შეერთებული შტატების დელეგაციას სახელმწიფო მდივნის მოადგილე ვენდი შერმანი ხელმძღვანელობდა, რუსეთის დელეგაციას კი საგარეო საქმეთა მინისტრის მოადგილე სერგეი რიაბკოვი.
დიალოგის მიმდინარეობის შესახებ სხვა დეტალები ჯერჯერობით უცნობია.
დისკუსიის ძირითად ნაწილს წინ უძღვოდა "წინასწარი მოლაპარაკებები", რომელიც 9 იანვრის საღამოს, საქმიანი ვახშმის ფორმატში გაიმართა.
შეხვედრაში ამერიკული მხრიდან მონაწილეობდა გაერთიანებული შტაბის ოპერატიული დეპარტამენტის დირექტორი, გენერალ-ლეიტენანტი ჯეიმს მინგესი და რუსეთის თავდაცვის მინისტრის მოადგილე გენერალ-პოლკოვნიკი ალექსანდრ ფომინი.
განხილვის მთავარი საკითხი ევროპის უსაფრთხოება და უკრაინაში რუსეთის მოსალოდნელი სამხედრო აგრესია იყო. რუსეთმა გასული წლის ბოლოს დასავლეთისგან მოითხოვა გარანტები, რომ ნატო შეწყვეტს აღმოსავლეთით გაფართოებას. უპირველესად, ეს მოთხოვნა საბჭოთა კავშირის ყოფილი რესპუბლიკებს, უკრაინასა და საქართველოს ეხება.
შეხვედრამდე სახელმწიფო მდივნის მოადგილემ, ვენდი შერმანმა განაცხადა, რომ ევროპის უსაფრთხოების საკითხებზე მოლაპარაკებებში ევროპაც უნდა იყოს ჩართული.
მისი განმარტებით, რომშეერთებული შტატები მზადაა სტრატეგიული სტაბილურობის შესახებ დიალოგის ფარგლებში განიხილოს რუსეთთან ორმხრივი ურთიერთობების გარკვეული პრობლემები, მაგრამ არ განიხილავს ევროპის უსაფრთხოების საკითხებს ევროპელი მოკავშირეებისა და პარტნიორების მონაწილეობის გარეშე.
ჟენევაში დაგეგმილი მოლაპარაკებების წინ, შეერთებული შტატებისა და რუსეთის მაღალი რანგის თანამდებობის პირებმა პესიმისტური განცხადებები გააკეთეს და აღნიშნეს, რომ განსაკუთრებულ გარღვევას ამ შეხვედრისგან არ მოელიან.
ჟენევაში შეერთებული შტატებისა და რუსეთის დელეგაციებს შორის კონსულტაციების შემდეგ, 12 იანვარს ბრიუსელში ნატო-რუსეთის საბჭოს სხდომა გაიმართება, მოლაპარაკებები გაგრძელდება 13 იანვარს ვენაში, ეუთო-ს ფორმატში.
