სომხეთ-თურქეთის ურთიერთობების ნორმალიზების მიზნით, ანკარასა ერევანს შორის დიალოგის პროცესში სომხეთის სპეციალური წარმომადგენელი ეროვნული ასამბლეის თავმჯდომარის მოადგილე რუბენ რუბინიანი იქნება.
ცოტა ხნით ადრე ცნობილი გახდა, რომ თურქეთმა სომხეთთან ურთიერთობების ნორმალიზების საკითხში სპეციალურ წარმომადგენლად აშშ-ში თურქეთის ყოფილი ელჩი, სერდარ კილიჩი დანიშნა.
თურქეთსა და სომხეთს შორის ურთიერთობების ნორმალიზებასა და სტამბოლსა და ერევანს შორის ავიამიმოსვლის მნიშვნელობაზე, რამდენიმე დღის წინ თურქეთის საგარეო საქმეთა მინისტრმა, მევლუთ ჩავუშოღლუმ ისაუბრა.
როგორც Reuters იუწყებოდა, პარლამენტში თურქეთის საგარეო საქმეთა სამინისტროს ბიუჯეტის განხილვისას ჩავუშოღლუმ განაცხადა, რომ ერევნისა და ანკარას მიერ დანიშნული სპეციალური წარმომადგენლები მოიძიებენ გზებს ორ მეზობელ ქვეყანას შორის ურთიერთობების ნორმალიზებისთვის.
გარდა ამისა, ჩავუშოღლუს თქმით, ორი ქვეყანა გეგმავს ჩარტერული ფრენების გახსნას სტამბოლსა და ერევანს შორის.
თურქულ მხარეს გამოეხმაურა სომხეთის საგარეო საქმეთა სამინისტრო. საგარეო უწყების პრესმდივნის ვაან უნანიანის განცხადებით, სომხეთი, ისევე, როგორც ადრე, მზადაა თურქეთთან ურთიერთობის ნორმალიზების პროცესისთვის წინაპირობების გარეშე, რაც ოფიციალური ერევნის ხელისუფლების პროგრამაშია გაწერილი.
თურქეთსა და სომხეთს დიპლომატიური ურთიერთობა არ აქვთ და მათ შორის სახმელეთო საზღვარი 1993 წლიდან დაკეტილია.
2008-2009 წლებში სომხეთის პრეზიდენტის სერჟ სარგსიანის დროს ერევანმა და ანკარამ სცადეს ურთიერთობების გაუმჯობესება და საზღვრის გახსნა, მაგრამ ორი გადაუჭრელი პრობლემის - ყარაბაღისა და თურქეთის მიერ 1915 წელს სომხების გენოციდის არ აღიარების გამო - ეს მცდელობა ჩაიშალა.ა