ინტერპოლის ახალ პრეზიდენტად არაბთა გაერთიანებული საამიროების გენერალ-მაიორი აჰმედ ნასერ ალ-რაისი აირჩიეს. გადაწყვეტილება მიიღეს სტამბოლში გამართულ გენერალური ასამბლეის 89-ე სესიაზე, რომელსაც 160 ქვეყნის წარმომადგენელი ესწრებოდა.
ინტერპოლის Twitter-ზე გამოქვეყნებულ ინფორმაციაში ნათქვამია, რომ აჰმად ნასერ ალ-რაისი აღნიშნულ პოსტზე ოთხი წლის ვადით აირჩიეს. მისი წინამორბედი სამხრეთ კორეელი კიმ ჩჟონ იანი იყო, რომელიც ამ პოსტზე 2018 წლიდან მუშაობდა.
მისი დანიშვნა მწვავედ გააკრიტიკეს ევროპის ადამიანის უფლებათა დაცვის ორგანიზაციებმა. Deutsche Welle-ს ინფორმაციით, ნასერ ალ-რაისი წამების საქმეზეა ბრალდებული. გენერლის წინააღმდეგ წამების შესახებ საჩივრები ბოლო თვეებში შეიტანეს საფრანგეთსა და თურქეთში, რომელიც ამ კვირაში სტამბოლში ინტერპოლის გენერალურ ასამბლეას მასპინძლობს.
მედიის ინფორმაციით, ახალი პრეზიდენტის არჩევამდე, არაბთა გაერთიანებულმა საამიროებმა ორგანიზაცია უხვად დააფინანსა და აბუ დაბიმ ბოროტად გამოიყენა ინტერპოლის ეგრეთ წოდებული "წითელი ცირკულარის" სისტემა ძებნილი ეჭვმიტანილების მიმართ პოლიტიკური დისიდენტების დევნის მიზნით.
აღსანიშნავია, რომ ინტერპოლის პრეზიდენტი მეტწილად ცერემონიულ უფლებამოსილებას ახორციელებს. ორგანიზაციის ყოველდღიურ მართვა გამგეობას ახორციელებს გენერალური მდივანი. ინტერპოლის გენერალური მდივანი იურგენ სტოკი 5-წლიანი ვადით 2019 წელს აირჩიეს.