რუსეთის ფედერაცია, რომლის 92 000-ზე მეტი სამხედრო უკრაინის საზღვრებთანაა კონცენტრირებული, 2022 წლის იანვრის ბოლოსთვის ან თებერვლის დასაწყისისთვის, უკრაინაში შეჭრისთვის ემზადება. ამის შესახებ უკრაინული გამოცემა "უკრაინსკაია პრავდა" იუწყება Military Times-ზე დაყრდნობით.
რუსეთის ზრახვებთან დაკავშირებით, Military Times-სს უკრაინის თავდაცვის სამინისტროს მთავარი სადაზვერვო სამმართველოს უფროსი კირილ ბუდანოვი ესაუბრა.
როგორც დაზვერვის მეთაური გამოცემასთან საუბრისას აღნიშნავს, რუსეთის მხრიდან თავდასხმები სავარაუდოდ მოიცავს საჰაერო დარტყმებს, საარტილერიო და სატანკო შეტევებს, რასაც მოჰყვება სადესანტო იერიშები აღმოსავლეთით, ასევე ოდესასა და მარიუპოლზე.
ბუდანოვმა თქვა, რომ ამ წლის დასაწყისში რუსეთის მასშტაბურმა სამხედრო წვრთნებმა Zapad-2021 აჩვენა, რომ მოსკოვს შეუძლია ერთდროულად გადაისროლოს 3500-ზე მეტი საჰაერო სადესანტო და სპეციალური ოპერაციების პერსონალი.
ბუდანოვმა ასევე აღნიშნა, რომ ამერიკული და უკრაინის დაზვერვის ვარაუდები რუსეთის შესაძლო თავდასხმის ვადებთან დაკავშირებით ძალიან ჰგავს ერთმანეთს: "ჩვენი შეფასებები თითქმის იგივეა, რაც ჩვენი ამერიკელი კოლეგების შეფასებები". საუბარია 2022 წლის იანვრის ბოლოს ან თებერვლის დასაწყისზე.
გამოცემის ვარაუდით, კრემლი გეგმავს თავდასხმას, რომლის მასშტაბები ბევრად აღემატება 2014 წლის სამხედრო მოქმედებებს.
პარასკევს უკრაინის თავდაცვის ახალმა მინისტრმა ალექსეი რეზნიკოვმა განაცხადა, რომ კიევისთვის ჯერ არ არის ცნობილი, მიიღო თუ არა პუტინმა საბოლოო გადაწყვეტილება უკრაინაში შეჭრაზე.
შეგახსენებთ, შეერთებული შტატების დაზვერვამ გააფრთხილა მოკავშირეები, რომ ცოტა დროა იმისთვის, რათა შეიმუშაონ ეკონომიკური და სამხედრო ზომების პაკეტი, რომელიც შეაკავებს რუსეთს უკრაინის წინააღმდეგ სამხედრო მოქმედებების განხორციელების გეგმებისგან.
