არანაირი ვალდებულება არ გვაქვს, რომ საკონსტიტუციო ცვლილებები მივიღოთ, - აცხადებს ფრაქცია "ქართული ოცნების“ თავმჯდომარე მამუკა მდინარაძე.
მისი განმარტებით, საკონსტიტუციო ცვლილებებზე მსჯელობის გაგრძელება პარტიის მხოლოდ კეთილ ნებაზეა დამოკიდებული.
"ჩვენ ამ ნებას თუ დავაფიქსირებთ, გამოვხატავთ, მაშინ ეს საკონსტიტუციო ცვლილებები მიღებული იქნება, ჩვენ ამისთვის მზად ვართ. მათ შორის ერთ-ერთი ძირითადი საკითხი გახლავთ ბარიერის დაწევა. ჩვენ მზად ვართ, ამაზე ვიმსჯელოთ, ისე არ არის, თითქოს ჩვენ ამას არ მივიღებთ და უარს ვამბობთ. ვმსჯელობთ შედეგიანად. როდესაც ვიღაც ამბობს, რომ ვინმემ ამაზე უარი თქვა, უბრალოდ ვაფიქსირებთ, რომ ეს არაა ვალდებულება, არამედ არის „ქართული ოცნების“ კეთილი ნება. ამასთან დაკავშირებით მსჯელობას გავაგრძელებთ, ეს იქნება დისკუსია და ამ დისკუსიის ფარგლებში ჩვენ მივიღებთ კონკრეტულ გადაწყვეტილებას“, – განაცხადა მამუკა მდინარაძემ.
