კონფლიქტოლოგი გოგი ხუციშვილი რუსეთის მიერ დნესტრისპირეთის ე.წ. დამოუკიდებლობის აღიარებას ნაკლებად ვარაუდობს.
"რუსეთისგან არაფერია გამორიცხული, თუმცა მისი მხრიდან დნესტრისპირეთის ე.წ. დამოუკიდებლობის აღიარების საკითხის დაყენება მეტისმეტი იქნება. ვფიქრობ, ის ამას არ გააკეთებს, რადგან საბაბი, რასაც შემდგომში გამოიყენებს, ცხინვალის მაგალითისგან განსხვავებით, ალბათ ნაკლებად ექნება", - განუცხადა ხუციშვილმა "ჯი-ეიჩ-ენს" მოლდოვას მიერ ნატოსთვის ქვეყნის ტერიტორიიდან რუსული ჯარის გაყვანის პროცესში დახმარების შეთავაზების საკითხზე კომენტირებისას.
"ცხინვალში შეჭრისა და შემდეგ მისი ე.წ. დამოუკიდებლობის აღიარების საბაბად მოსკოვმა ქართული შეიარაღებული ძალების მიერ იქ შეჭრა დაასახელა, რაც, რეალურად ასე ნამდვილად არ იყო, თუმცა ეს სათავისოდ გამოიყენა. ვფიქრობ, დნესტრისპირეთის შემთხვევაში ასეთი საბაბი ნაკლებად მიეცემა", - დასძინა კონფლიქტოლოგმა.
შეგახსენებთ, რომ მოლდოვას პრეზიდენტის მოვალეობის შემსრულებელმა მიხაი გიმპუმ ნატოს გენმდივანს წერილი გაუგზავნა, რომელშიც ის ნატოს ქვეყნის ტერიტორიიდან რუსული ჯარების გაყვანის პროცესში დახმარებას თხოვს.
"იმ შემთხვევაში, თუ მოლდოვა არ დათანხმდება დნესტრისპირეთში რუსული ჯარის ყოფნას, რუსეთმა, შესაძლოა, აფხაზეთისა და სამხრეთ ოსეთის მსგავსად, დნესტრისპირეთის დამოუკიდებლობაც აღიაროს
იმისთვის, რომ მოლდოვის ტერიტორიაზე თავისი ჯარი შეინარჩუნოს, - ნათქვამია გიმპუს წერილში.
