მიხეილ სააკაშვილო, დედებს სიცოცხლე წაგვართვი, დიდი დრო გექნება და ჯობია, დაფიქრდე ჩადენილ ბოროტებებზე, როგორ დაგვიხვრიტე ანგელოზი შვილები, – ასე მიმართა ბუტა რობაქიძის დედა ია მეტრეველმა მიხეილ სააკაშვილს რუსთავის ციხესთან, სადაც "ნაციონალური მოძრაობის" ხელისუფლებაში ყოფნის დროს დაზარალებულები აქციას მართავენ.
ია მეტრეველის თქმით, მიხეილ სააკაშვილს ხალხისა და ერის წინაშე ძალიან ბევრი დანაშაული აქვს ჩადენილი და აღნიშნა, რომ მას სამუდამო პატიმრობა ეკუთვნის.
„ძალიან დიდი მადლობა, რომ ამდენი ხალხი შეწუხდით და მობრძანდით. ძალიან ცუდად ვარ, აქ ქალბატონიც ცუდად გახდა, ჩემსავით გაუბედურებული დედა, ჯერ შვილი მოუკლა, მერე ქმარი, გარეწარო მიშა, კიდევ პოლიტპატიმრობა გინდა? გაუბედურებული დედების აქ ჯერ მცირე რაოდენობა ვართ, ჯერ ყველანი ვერ ვართ, რაც გაგვანადგურე, დაგვაქციე და სიცოცხლე წაგვართვი, ჩვენი შვილები იქით არიან და ჩვენ აქ, მკვდრები ვართ ამ მიწაზე. არ ვიცი, მეტი რაღა უნდა ჩაგედინა, ბოროტო სულო. თუ ბიჭების დახოცვიდან დაიწყე და მიწების გაყიდვით დაამთავრე ყველაფერი, რომელ პოლიტპატიმრობაზე გაქვს პრეტენზია, პოლიტპატიმრობა კი არა, სამუდამო პატიმრობა გეკუთვნის და ალბათ არ აგცდება. რომელი ექვსი წელი, იმდენი დანაშაული გაქვს ჩადენილი ხალხისა და ერის წინაშე. ასეთი მტერი შენ რომ ხარ და შენი მომხრეები, არ ყოლია საქართველოს. უბრალოდ ის მიკვირს, კიდევ შენნაირები რომ ყოლია ქვეყანას, ვიღაც მომხრეები რომ გყავს, ცოტა მაგრამ მაინც. რაღაც მინდოდა, მეთქვა, მაგრამ აზრი არ აქვს. სააკაშვილის მომხრე როცა ხარ, იქ დამთავრებულია ყველაფერი. შენ ხარ ისეთივე ბოროტმოქმედი და მკვლელი, როგორც სააკაშვილი. როგორ შეიძლება, კაცების გამაუპატიურებელს უჭერდე მხარს, ციხეში რასაც შენ ხალხს უშვრებოდი, რომ რიგ-რიგობით ასუნთქებდი ჟანგბადს, რიგ-რიგობით აძინებდი კვირაში ერთი დღე, შენ ეგეთ ციხეში არ ზიხარ ახლა, რაც შექმენი და როგორიც გქონდა, ისეთ ციხეში უნდა იჯდე. სანატორიუმში რომ ხარ აქ და გვატყუებ, ვშიმშილობ და კილოობით თაფლს ათავებ და ცოცხალ წვენებს სვამ”, - განაცხადა მეტრეველმა და ხელისუფლებას მიართა დამნაშავე პატიმარს, ისე მოექცნენ, როგორც ეკუთვნის და როგორც არის კანონის მიხედვით.
„ხელისუფლებას მინდა მივმართო, ძალიან გთხოვთ, ამ ლოიალობას დაანებეთ თავი და ისე მოექეცით ამ დამნაშავე პატიმარს, როგორც ეკუთვნის და როგორც არის კანონის მიხედვით. არა ისე, ფუფუნებაში რომ ბრძანდება და კიდევ პრეტენზიები აქვს. მოძღვრავს თავის სექტას და იქიდან კარნახობს, როგორ უნდა მოიქცნენ და რა გააკეთონ. ამის უფლებას ნუ აძლევთ, რომ კიდევ არიონ აქაურობა. აღარ შეგვიძლია, ძალიან დავიღალეთ. ამდენი წელია, ამ ჯოჯოხეთს ვუძლებთ. ჯერ მაგათი ჯოჯოხეთი გამოვიარეთ, ახლა კიდევ მუდმივად ამათთან ჭიდილში ვართ. აკრძალეთ როგორც პოლიტიკური პარტია „ნაციონალური მოძრაობა“. აღარასოდეს მიეცეთ მათ უფლება, მონაწილეობა მიიღონ არჩევნებში“, – განაცხადა ია მეტრეველმა.