"არავინ არ უნდა მოტყუვდეს, რომ ამის შედეგად რაიმე ნაირად შეაჩერებენ აგრესიას, პირიქით გაიმტკიცებენ მდგომარეობას, დიპლომატიურად და კიდევ უფრო დიდ პრობლემას შეუქმნიან ჩვენს ქვეყანას ფიზიკურად", - განაცხადა „ევროპული საქართველოს“ თავმჯდომარე გიგა ბოკერიამ
"რუსეთის ფედერაციას პერიოდულად ყოველთვის ქონდა ხოლმე მცდელობა, რომ ამ ტიპის მცდელობებით ოკუპაციის და მარიონეტული ხელისუფლებების ლეგიტიმაცია მოეხდინა, რა თქმა უნდა არც ერთი ფორმით არ არის დასაშვები ჩვენი ეროვნული ინტერესებისთვის ამ ტიპის დისკუსიაში შესვლაც კი, ჯერ ერთი არავინ არ უნდა მოტყუვდეს, რომ ამის შედეგად რაიმე ნაირად შეაჩერებენ აგრესიას, პირიქით გაიმტკიცებენ მდგომარეობას, დიპლომატიურად და კიდევ უფრო დიდ პრობლემას შეუქმნიან ჩვენს ქვეყანას ფიზიკურად და ამასთან ერთად პოლიტიკურად, პრინციპიალურად დაუშვებელია კომპრომისი და მარიონეტული ხელისუფლების რაიმე სახით ჩართვა ე.წ დელიმიტაციაში საოკუპაციო ხაზის", - განაცხადა ბოკერიამ.
შეგახსენებთ, ჟენევაში გამართული მოლაპარაკებების 54-ე რაუნდის შემდეგ, ოკუპანტი რუსეთის საგარეო საქმეთა სამინისტრომ გაავრცელა განცხადება, სადაც გამოვიდა შეთავაზებით, "დაიწყოს საქართველოს, აფხაზეთსა და სამხრეთ ოსეთთან საზღვრების დელიმიტაციის პროცესი, მათი შემდგომი დემარკაციისთვის".
კრემლის განცხადებას მალევე უპასუხა საქართველოს საგარეო საქმეთა სამინისტრომ, რომელმაც ამ შეთავაზებას მიუღებელი უწოდა და აღნიშნა, რომ საკითხის ერთადერთი გადაწყვეტა საქართველოს ტერიტორიების დეოკუპაციაა.
შემოთავაზებას გამოეხმაურა საქართველოს პრემიერ-მინისტრიც, რომელმაც განაცხადა, რომ რუსეთის ფედერაციასთან საზღვრების დელიმიტაცია-დემარკაცია მოხდება ერთიანი საქართველოს საზღვრების ფარგლებში.
