როცა ოფისისკენ მოვდიოდი, სააკაშვილმა კანალიზაციის ჭიდან ამოყვინთა და დაიძახა, ჩამოვედიო, სამწუხაროდ, მერე ისევ შეერია ამ უსასრულო სამყაროს, ჩავიდა და დახურა, – ამის შესახებ საპარლამენტო უმრავლესობის წევრმა, ბექა დავითულიანმა განაცხადა.
დავითულიანის განცხადებით, შესაძლოა, სააკაშვილის მიერ გამოქვეყნებული ვიდეოკადრები გაყალბებული იყოს.
"დიპფეიკზე იმდენი ილაპარაკა „მთავარმა არხმა“, რომ შეიძლება ეს კადრები იყოს გაყალბებული, მეორე ეს თუ ასე არ არის, დაემატება კიდევ ერთი მუხლი საზღვრის უკანონო კვეთისთვის და კიდევ უფრო დიდი სასჯელს მოიხდის, თუმცა დიდი ალბათობით ეს არის რეალითი შოუ. ფაქტია, ამ ადამიანს ბავშვობაში დაუხუჭობანას არავინ ეთამაშებოდა, ახლა ამ ასაკში გადაწყვიტა ამ ფორმით. დახუჭობანას თამაშობს, ძალიან სასაცილო და არასერიოზული. რაც შეეხება სახელმწიფო უსაფრთხოების სამსახურებს, ისინი ამაზე გაგცემენ პასუხს, რაც შეეხება პოლიტიკური შეფასებას, ეს არის ღრმად არასერიოზული, მართლა მგონია, რომ ბავშვობაში დახუჭობანას არავინ ეთამაშებოდა", - განაცხადა დავითულიანმა.
მიხეილ სააკაშვილმა სოციალურ ქსელში დაწერა, რომ უკვე საქართველოშია, შემდეგ კი ბათუმიდან ვიდეომიმართვაც გამოაქვეყნა.