შეერთებული შტატების პრეზიდენტ ჯო ბაიდენსა და საფრანგეთის რესპუბლიკის პრეზიდენტ ემანუელ მაკრონს შორის სატელეფონო საუბარი გაიმართა.
თეთრი სახლის ინფორმაციით, ორი ქვეყნის ლიდერი ერთმანეთს ოქტომბრის ბოლოს შეხვდება, მანამდე კი პარიზი ვაშინგტონში დააბრუნებს ელჩს, რომელიც რამდენიმე დღის წინ კონსულტაციებისთვის გამოიძახა.
"მაკრონმა გადაწყვიტა, რომ საფრანგეთის ელჩი ვაშინგტონში მომავალ კვირას დაბრუნდება. შემდეგ ის დაიწყებს აქტიურ მუშაობას აშშ -ს მაღალჩინოსნებთან", - ნათქვამია ლიდერების ერთობლივ განცხადებაში.
ემანუელ მაკრონი და ჯო ბაიდენი ასევე შეთანხმდნენ, რომ დაიწყონ "სიღრმისეული კონსულტაციების პროცესი" ორ ქვეყანას შორის ნდობის აღდგენის მიზნით.
შეერთებულ შტატებს, ავსტრალიასა და დიდ ბრიტანეთს შორის გაფორმებული უსაფრთხოების პაქტის შემდეგ, მკვეთრად დაიძაბა ურთიერთობები პარიზსა და ვაშინგტონს შორის. საფრანგეთი ძალზედ მტკივნეულად შეხვდა AUKUS-ის სახელით ცნობილ შეთანხმებას. საგარეო საქმეთა მინისტრმა ჟან-ივ ლე დრიანმა მკაცრად გააკრიტიკა შეთანხმების მხარეები და ისინი ზურგში ლახვრის ჩაცემაში დაადანაშაულა.
მოგვიანებით, საფრანგეთმა უსაფრთხოების პაქტისადმი პროტესტის ნიშნად, ვაშინგტონიდან და კანბერადან ელჩები გაიხმო კონსულტაციებისთვის.
შეგახსენებთ, 16 სექტემბერს შეერთებულმა შტატებმა, დიდმა ბრიტანეთმა და ავსტრალიამ უსაფრთხოების პაქტი წარადგინეს, რომელიც მიზნად ისახავს ინდო-წყნარი ოკეანის რეგიონში მათი ინტერესების დაცვასა და ჩინეთის მზარდი გავლენების შეკავებას.
უსაფრთხოების პაქტი, რომელიც AUKUS-ის (Australia, United Kingdom, United States) სახელით არის ცნობილი, ასევე ითვალისწინებს თანამშრომლობასა და მოწინავე ტექნოლოგიების გაზიარებას ხელოვნური ინტელექტის, კიბერ და კვანტური ტექნოლოგიების სფეროებში.
ამასთან, ახალი შეთანხმების ფარგლებში ავსტრალიას შეეძლება ააგოს ბირთული წყალქვეშა ნავები ამერიკის შეერთებული შტატების მიერ გაზიარებული ტექნოლოგიების გამოყენებით.
ამერიკული ტექნოლოგიებით აგებული ატომური წყალქვეშა ნავები გაცილებით მაღალტექნოლოგიურია ვიდრე კონვენციური წყალქვეშა ნავები. მათ შეუძლიათ დარჩნენ წყალქვეშ თვეების განმავლობაში, ისროლონ რაკეტები უფრო დიდ დისტანციებზე და ასევე გადაზიდონ დიდი რაოდენობის ტორპედოები.
აშშ 50 წლის განმავლობაში პირველად გააზიარებს წყალქვეშა ნავის ტექნოლოგიებს. მანამდე მან მხოლოდ ბრიტანეთს გაუზიარა თავისი ტექნოლოგია.
ამდენად, ავსტრალია გახდება მსოფლიოში მეშვიდე ქვეყანა, რომელიც ექსპლუატაციას გაუწევს ბირთვულ წყალქვეშა ნავებს, აშშ-ის, დიდი ბრიტანეთის, საფრანგეთის, ჩინეთის, ინდოეთისა და რუსეთის შემდეგ.
