საფრანგეთი შეერთებულ შტატებს, ბრიტანეთსა და ავსტრალიას შორის გაფორმებული უსაფრთხოების პაქტისადმი პროტესტის ნიშნად, ვაშინგტონიდან და კანბერადან ელჩებს გაიხმობს კონსულტაციებისთვის.
"რესპუბლიკის პრეზიდენტის თხოვნით, მე გადავწყვიტე სასწრაფოდ გამოვიძახო პარიზში კონსულტაციისთვის ჩვენი ელჩები შეერთებულ შტატებსა და ავსტრალიაში", - ნათქვამია საფრანგეთის საგარეო საქმეთა მინისტრის ჟან-ივ ლე დრიანის განცხადებაში.
მანამდე, 16 სექტემბერს, საფრანგეთის საგარეო საქმეთა მინისტრმა ჟან-ივ ლე დრიანმა მკაცრად გააკრიტიკა ვაშინგტონი და კანბერა, რადგან ახალი პაქტის თანახმად, ავსტრალიასა და ფრანგულ გემთმშენებელ კომპანიას შორის გაფორმებული მრავალმილიარდიანი კონტრაქტი ანულირებულად გამოცხადდა.
2016 წელს ავსტრალიის მთავრობამ ფრანგულ კომპანია Naval Group-თან გააფორმა კონტრაქტი, რომლის თანახმადაც გემთმშენებელ კომპანიას ავსტრალიისთვის 12 წყალქვეშა ნავი უნდა აეშენებინა, 56 მილიარდ დოლარად.
"პირდაპირ რომ ვთქვათ, ეს არის ზურგში ლახვრის ჩაცემა. ეს ანადგურებს ნდობას და ძალიან აღშფოთებული ვარ", - განაცხადა ივ ლე დრიანმა.
ამასთანავე, საფრანგეთის საგარეო საქმეთა მინისტრმა, აშშ-ის პრეზიდენტი ჯო ბაიდენი მისი წინამორბედის, დონალდ ტრამპის მსგავს მოქმედებებში დაადანაშაულა.
"ეს ცალმხრივი, სასტიკი და არაპროგნოზირებადი გადაწყვეტილება ძალიან ჰგავს იმას, რასაც ბატონი ტრამპი აკეთებდა. პრეზიდენტ ბაიდენის განცხადებით მოულოდნელად შევიტყვეთ, რომ საფრანგეთსა და ავსტრალიას შორის კონტრაქტი შეწყდა და შეერთებული შტატები ავსტრალიელებს შესთავაზებს ბირთვულ შეთანხმებას, რომლის შინაარსი არ ვიცით. მოკავშირეებს ასე არ ექცევიან", - განაცხადა მინისტრმა.
აღნიშნულთან დაკავშირებით კომენტარი გააკეთა საფრანგეთის თავდაცვის მინისტრმა, ფლორანს პარლიმაც, რომელმაც ახალ შეთანხმებას "ძალიან ცუდი ამბავი და საერთაშორისო პოლიტიკის სფეროში საშინელი გადაწყვეტილება" უწოდა.
"ახლა ვხედავთ, როგორ ექცევა შეერთებული შტატები თავის მოკავშირეებსა და პარტნიორებს. ახსნა-განმარტებების გაკეთება მოუწევთ. ჩვენ ავსტრალიასთან კონტრაქტი გვქონდა, მათ უნდა განმარტონ, როგორ აპირებენ ამისგან თავის დაღწევას", - დასძინა პარლიმ.
ბრიტანეთის თავდაცვის მდივანმა ბენ უოლესმა, თავის მხრივ, თქვა, რომ ახალი პაქტი შეერთებულ შტატებსა და ავსტრალიასთან არ მიანიშნებს საფრანგეთთან სტრატეგიულ უთანხმოებაზე. ამავე დროს, მან აღნიშნა, რომ მას ესმის პარიზის იმედგაცრუება ხელშეკრულების გაუქმების გამო.
აშშ-ის პრეზიდენტმა ჯო ბაიდენმა განაცხადა, რომ საფრანგეთი ინდო-წყნარი ოკეანის რეგიონში აშშ-ის მთავარ პარტნიორად რჩება, რომელთანაც მომავალშიც გეგმავს მჭიდრო თანამშრომლობას.
