როგორც სააგენტო „ჯი-ეიჩ-ენს" აჭარის ფინანსთა და ეკონომიკის სამინისტროდან აცნობეს, 2011 წლის ბიუჯეტის პროექტის თანახმად, შემოსავლები 79 მლნ. 800 ათასი ლარით, ხოლო არაფინანსური აქტივების კლება 15 მლნ. ლარით განისაზღვრა.

აღსანიშნავია, რომ ავტონომიური რესპუბლიკის რესპუბლიკური ბიუჯეტი აღარ ღებულობს ფინანსურ დახმარებას (ტრანსფერს) საქართველოს სახელმწიფო ბიუჯეტიდან, რითაც ავტონომიური რესპუბლიკის რესპუბლიკურ ბიუჯეტს მეტი ფინანსური დამოუკიდებლობა მიენიჭა. რესპუბლიკურ ბიუჯეტში გათვალისწინებული ხარჯები მთლიანად ფინანსდება საკუთარი შემოსავლებით.

2010 წლის ავტონომიური რესპუბლიკის რესპუბლიკური ბიუჯეტის შემოსულობები და ფინანსური აქტივები 101 მლნ. 997 ათას 600 ლარის ოდენობით განისაზღვრა.

2010 წლის რესპუბლიკური ბიუჯეტის გადასახადების საპროგნოზო მაჩვენებელი 75 მლნ. 630 ათას ლარს შეადგენს, რაც 2009 წლის შესაბამის მაჩვენებელს 13 მლნ. 717 ათას 200 ლარით აღემატება. 2009 წელთან შედარებით გადასახადის კატეგორიიდან მისაღები შემოსავლების ზრდა ძირითადად ეკონომიკურ ზრდას და ადმინისტრირების გაუმჯობესებას უკავშირდება. რესპუბლიკურ ბიუჯეტში გადასახადების კუთხით ირიცხება მხოლოდ საშემოსავლო გადასახადი.

2010 წლის რესპუბლიკური ბიუჯეტის სხვა შემოსავლების საპროგნოზო მაჩვენებელი 2 მლნ. 450 ათასს ლარს შეადგენს, რაც 2009 წლის ანალოგიურ მაჩვენებელს 1 მლნ. 625 ათას 800 ლარით ნაკლებია, რაც ძირითადად გამოწვეულია 2009 წლის განმავლობაში განხორციელებული ერთჯერადი გადახდებით.

2010 წელს არაფინანსური აქტივების კლებიდან მისაღები სახსრების საპროგნოზო მოცულობა 20 მლნ. 600 ათას ლარს შეადგენს, რაც 11 მლნ. 367 ათას 800 ლარით აღემატება 2009 წლის შესაბამის მაჩვენებელს.

აჭარის ფინანსთა და ეკონომიკის სამინისტროს ინფორმაციით, აღნიშნული სახსრების მობილიზება მთლიანად სახელმწიფო და რესპუბლიკური საკუთრების ქონების რეალიზაციიდან ხორცილდება. 2010 წელს ავტონომიური რესპუბლიკის რესპუბლიკური ბიუჯეტის ასიგნებები 101 მლნ. 997 ათას 600 ლარის ოდენობით განისაზღვრა, მიუხედავად იმისა, რომ მიმდინარე წელს სახელმწიფო ბიუჯეტიდან რესპუბლიკური ბიუჯეტი აღარ ღებულობს ფინანსურ დახმარებას, და რომელიც 2009 წელს 42 732 ათას ლარს შედგენდა.