ადამიანის უფლებათა ევროპულმა სასამართლომ დაადგინა, რომ რუსეთის ხელისუფლება პასუხისმგებელია დიდ ბრიტანეთში უსაფრთხოების ფედერალური სამსახურის ყოფილი თანამშრომლის ალექსანდრ ლიტვინენკოს მოწამვლაში.
სტრასბურგის სასამართლო ასევე მიიჩნევს, რომ რუსეთმა არ ჩაატარა სათანადო გამოძიება ლიტვინენკოს მკვლელობაში დამნაშავე პირების გამოსავლენად.
დადგენილებაში ნათქვამია, რომ მოპოვებულია მყარი მტკიცებულებები იმისა, როომ მოწამვლასთან კავშირი აქვს რუსეთის ორ მოქალაქეს - ანდრეი ლუგოვოისა და დმიტრი კოვტუნს. სასამართლოს მიაჩნია, რომ რუსეთის ხელისუფლებამ ვერ შეძლო ბრიტანული გამოძიების მასალების უარყოფა.
სასამართლომ ასევე დაავალდებულა რუსეთის ხელისუფლება, ლიტვინენკოს ქვრივს კომპენსაციის სახით 100 000 ევრო გადაუხადოს.
ალექსანდრ ლიტვინენკო, რომელმაც 1998 წელს საჯაროდ განაცხადა, რომ ბიზნესმენ ბორის ბერეზოვსკის მოკვლა დაავალეს, 2000 წელს ბრიტანეთში გაიქცა, სადაც მან პოლიტიკური თავშესაფარი და მოქალაქეობა მიიღო. 2006 წელს ის რადიოაქტიური ნივთიერება პოლონიუმ -210-ით მოწამვლის შედეგად გარდაიცვალა.
ლონდონის განცხადებით, ეს იყო რადიოაქტიური ნივთიერება პოლონიუმ -210-ით ადამიანის მოწამვლის პირველი შემთხვევა.
ბრიტანეთის ხელისუფლებამ მომხდარში რუსეთი დაადანაშაულა. გამოძიების ავტორი რობერტ ოუენი ამბობს, რომ დამნაშავეებს შესაძლოა მხარს უჭერდა პირადად ვლადიმირ პუტინი. რუსეთის გენერალური პროკურატურა ამტკიცებდა, რომ ლუგოვოისა და კოვტუნის წინააღმდეგ ბრალდების ფაბრიკაცია მოხდა.
