პრეზიდენტ მიხეილ სააკაშვილის შეფასებით, რისი დაშავებაც რუსეთს საქართველოსთვის შეეძლო, უკვე ყველაფერი დაგვიშავა.
"ვინც ამბობს, რომ არ უნდა დავიჭიროთ ჯაშუშები, რათა ვიღაცები არ გავაღიზიანოთ, ვინც ამტკიცებს, რომ ჩვენს ღირსებაზე არ უნდა ვილაპარაკოთ, რადგან ისინი ღიზიანდებიან, მინდა მათ გასაგონად ვთქვა: მეტი რაღა უნდა გაგვიფუჭდეს ურთიერთობები? ყველაფერი, რისი დაშავებაც შეეძლოთ, უკვე დაგვიშავეს. ამის შემდეგ იმედია მხოლოდ გაუმჯობესდება ურთიერთობა, თუმცა დღეს ძალიან მძიმე სიტუაციაა", - განაცხადა სააკაშვილმა სოფელ შამგონაში ყოფნისას.
მისი განმარტებით, რუსეთთან საბჭოთა კავშირის ყველა ყოფილ რესპუბლიკას აქვს პრობლემები.
"ჩვენ რატომაც გვაქვს პრობლემები, გასაგებია: გვყავს ყველაზე დამოუკიდებელი ხალხი და გვაქვს ყველაზე ლამაზი ქვეყანა. მათ უნდათ, ამ სილამაზეს დაეუფლონ. ეს მათი ინსტიქტი", - განმარტა სააკაშვილმა.
