ცნობილ ქართველ მოცურავეს, ჰენრი კუპრაშვილს 13 სექტემბერს 75 წელი უსრულდება. ახალი ამბების სააგენტო "ჯი-ეიჩ-ენი" უერთდება მილოცვას და ბატონ ჰენრი კუპრაშვილს უსურვებს ჯანმრთელობასა და დიდხანს სიცოცხლეს.
საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის პროფესორს, გადამდგარ პირველი კლასის სახელმწიფო მრჩეველს, ვიცე-პოლკოვნიკს, ომის ვეტერანს, საქართველოს სპორტის დამსახურებულ მოღვაწეს ჰენრი კუპრაშვილს მიღებული აქვს ჯილდოები: 1. ვახტანგ გორგასლის II ხარისხის ორდენი; 2. მედლები: ბაირონის (ოქრო, დიდი ბრიტანეთი), "მხედრული მამაცობისათვის" (საქართველო), "სამაგალითო სამსახურისათვის" (უკრაინა), "თავისუფლების მსოფლიო მედალი" (ამერიკის ბიოგრაფიული ინსტიტუტი) და სხვ. იგი არის წლის ადამიანი – 2002 (გაზეთი "ახალი ეპოქა")...
მსოფლიო მასმედიის მიერ მისთვის შერქმეული თიკუნები "ადამიანი დელფინი" (ტ/კომპანია CNN - სი-ენ-ენ-ი), "წყლის პრომეთე", "დარდანელის გმირი", "სრუტეთა მბრძანებელი", "კაცი ლეგენდა" და სხვ.
ჰენრი კუპრაშვილს ვარჯიშებსა და შეჯიბრებებზე გაცურული აქვს 45 ათას კილომეტრზე მეტი.
მისი მოღვაწეობა მრავალ სფეროს მოიცავს:
I. ჰენრი კუპრაშვილი სპორტში:
მან კაცობრიობის ისტორიაში პირველმა გაცურა 2 კმ. "მხედრული კოლხურით" (ცურვის ქართული სამხედრო-საწვრთნელი სტილით, ოთხგან ხელფეხშეკრულმა) "ლაგუნა ვერეს" აუზში – 28.01.2001.
მან მსოფლიოში პირველმა "მხედრული კოლხურით" (ოთხგან ხელფეხშეკრულმა) 3 საათსა და 15 წუთში გადაცურა დარდანელის სრუტე ევროპიდან აზიაში, 12 კმ. – 30.08.2002, ჩანაქკალე, თურქეთი;
იგი არის ფუძემდებელი:
• მსოფლიოში სრუტეთა ახალი წესით გადაცურვისა;
• ქართული (კოლხურ-იბერიული) სტილით ცურვისა;
• საქართველოში პარაცურვისა.
იგი არის პირველი:
• მწვრთნელი, როლის აღზრდილიც (ნიკა თვაური) დამოუკიდებელი საქართველოს ისტორიაში პირველად გახდა ცურვაში მსოფლიო ჩემპიონატის პრიზიორი (2011, თურქეთი).
• მოცურავე დამოუკიდებელი საქართველოს ისტორიაში პირველად გახდა ზამთრის (ყინულჭრილში) ცურვაში მსოფლიო ჩემპიონატის პრიზიორი (2018, ტალინი,ესტონეთი).
• ქართველი საერთაშორისო მარათონელი მოცურავე;
• ქართველი მოცურავე „ოუშენმენი“ (OCEANMAN).
იგი არის:
• მსოფლიო ჩემპიონი (მასტერს): ბიატლში (ინდივიდუალური) – 2018 (ჰურგადა, ეგვიპტე); ბიატლში (გუნდური) – 2015); ტრიატლში (გუნდური) – 2015; ბრინჯაოს პრიზიორი ტრიატლში (ინდივიდუალური) – 2018 (ჰურგადა, ეგვიპტე). ევროპის ჩემპიონატის ვერცხლის პრიზიორი ბიატლში (ინდივიდუალური) – 2019 (მაშიკუ, პორტუგალია).
• მსოფლიო ჩემპიონატის ბრინჯაოს პრიზიორი ზამთრის ცურვაში (2018, ტალინი ესტონეთი);
• მონაწილე: ბოსფორის სრუტის თავისუფალი სტილით საკონტინენტთაშორისო გადაცურვის - 07.07.2013 (სტამბოლი); მსოფლიო რბენის, სირბილში სხვადასხვა ნახევარმარათონებისა და სხვ.
II. ჰენრი კუპრაშვილმა გარდა სპორტისა წარმატებას მიაღწია სხვა მრავალ სფეროში: სამეცნიერო, სასწავლო, ეროვნული მოძრაობა, საზოგადოებრივი...
მეცნიერი, პედაგოგი და პუბლიცისტი:
პოლიტიკის მეცნიერებათა დოქტორი; ავტორი 5 მონოგრაფიის, 7 სახელმძღვანელოსი, 100-ზე მეტი სამეცნიერო ნაშრომის, პრესაში გამოქვეყნებული 400-ზე მეტი სტატიის, ინტერვიუსა და საერთაშორისო სამეცნიერო კონფერენციაზე წაკითხული 50-ზე მეტი მოხსენებისა. მისი ხელმძღვანელობით დაცულია 17 სადოქტორო დისერტაცია.
ავტორი და ხელმძღვანელი ეროვნული უშიშროების საბჭოში 1996 წელს დაწყებული 2 პროექტისა "დიდგორი" და "აისი", ასევე სტუ-ს სამართლისა და საერთაშორისო ურთიერთობების ფაკულტეტზე განხორციელებული მულტი და ინტერსციპლინური სასწავლო-სამეცნიერო პროექტისა "პოლიტიკა სამსჯავროზე".
არის: 1973 წელს შექმნილი ნახევრად არალეგალური დავით აღმაშენებლის ჩოხოსანთა კავშირის - ჩოხოსნები 1973 დამაარსებელი და დღემდე მისი უცვლელი თავმჯდომარე; 1990 წელს შექმნილი საქართველოს ზღვისპირეთის დამცველთა ასოციაცია "აიეტის" დამაარსებელი და თავმჯდომარე; ჟურნალისტთა ფედერაციის წევრი; საქართველოს ცურვის ეროვნულ სახეობათა ფედერაციის პრეზიდენტი;
არჩეული იყო: საქართველოს ერის ღირსების დამცველთა ასოციაცია "იმედის" საწინამძღვროს წევრად (1989-1991); საქართველოს სახალხო ფრონტის დარბაზის წევრად (1989-1992) და სხვ.
ჰყავს მეუღლე, 4 შვილი, 8 შვილიშვილი და 2 შვილთაშვილი.
III. ჰენრი კუპრაშვილი მწვრთნელი - მისმა აღზრდილებმა მისი ხელმძღვანელობით:
• 11 მოსწავლემ მონაწილეობა მიიღო კოლხურით ცურვის პირველ შეჯიბრებაზე (2004 წელს ლაგუნა ვერეზე შექმნა კოლხურ-იბერიული სტილით ცურვის შემწავლელი მსოფლიოში პირველი ჯგუფი და ცურვა შეასწავლა დემირელი კოლეჯის მოსწავლეებს).
• ვოვა გოიაშვილის ხელშეწყობით, ლაგუნა ვერეს მწვრთნელ დიმიტრი დიკთან ერთად მისმა მომზადებულმა ნინო ბასილაიამ (11 წლის), ანი სიჭინავამ (11 წლის), ირაკლი შენგელიამ (12 წლის), თემურ კობახიძემ (12 წლის), ნასტია გრივაჩმა (13 წლის), დათო ბარდაველიძემ (14 წლის) და თიკა ბაკურაძემ (15 წლის) 2006 და 2007 წლებში მსოფლიოში პირველებმა „მხედრული კოლხურით“ ჯგუფურად გადაცურეს თბილისის ზღვა (4 კმ. დისტანცია).
• 11 წლის ჯიმიკო ბროძელმა „მხედრული კოლხურით“ (ცურვის სამხედრო-საწვრთნელი სტილი) გადაცურა თბილისის ზღვა (03.08.2008), ამზადებდა დარდანელის სრუტის გადასაცურად, მაგრამ 2008 წლის აგვისტოს ომის გამო ჩაიშალა;
• SB11 კატეგორიის პარამოცურავემ, ორივე თვალით უსინათლო და მარჯვენა ხელის მტევანამპუტირებულმა ნიკა თვაურმა მსოფლიო ჩემპიონატზე (ქ. ალანია, თურქეთი, 04.04.2011) ბრასით სტილით ცურვაში მოიპოვა ბრინჯაოს მედალი;
• 17 წლის ანა ლომინაძემ „მხედრული კოლხურით“ გადაცურა დარდანელის სრუტე (30.08.2012).
ამავე დროს იგი არის ავტორი: სპორტული ტანვარჯიშის კოლხურ-იბერიული კომპლექსისა და ქართული ცურვის სახელმძღვანელოსი. კეთილი ნების ელჩი: ფრთები სიცოცხლისათვის (Wings for Life); ოუშენმენის შვეიცარიის ტურის; ღია წყალზე საერთაშორისო შეჯიბრების „თბილისის ცურვის ფესტივალი“ და სხვ.