დედაქალაქის მერია ინდივიდუალურ მეწარმეებს საგადასახადო კოდექსთან დაკავშირებით უფასო ლექციების კურსს სთავაზობს.
პროექტის პრეზენტაცია, რომელიც თბილისის მთავრობამ შემოსავლების სამსახურთან ერთად წამოიწყო, დღეს, ისნის ბაზრობაზე გაიმართა.
დედაქალაქის მერის გიგი უგულავას განცხადებით, ლექციები ინდმეწარმეებს საშუალებს მისცემს ახალ საგადასახადო კოდექსს დეტალურად გაეცნონ, რათა ბიზნესის კეთებისას ნაკლები შეცდომები დაუშვან.
"მერიამ ყველაფერი გააკეთა იმისთვის, რომ ადამიანს, რომელსაც ბიზნესის წარმოების სურვილი აქვს, იმის შესაძლებლობაც ჰქონდეს, რომ შესაბამის სფეროში განათლება მიიღოს. ეს ტრენინგები უნიკალური შესაძლებლობაა, რომ თითოეული მეწარმე-სუბიექტი ახალ საგადასახადო სისტემას გაეცნოს და შესაბამისად, ბიზნესის კეთებისას ნაკლები შეცდომები დაუშვას", - განაცხადა გიგი უგულავამ პროექტის "ცოდნა ბიზნესის წარმატებისთვის" პრეზენტაციისას.
სასწავლო ცენტრებმა ფუნქციონირება ყველა მოქმედ ბაზრობაზე უკვე დაიწყეს. ჯგუფებში 20-20 კაცია წარმოდგენილი და მათ ლექციების მოსმენა უფასოდ შეუძლიათ. ლექციები 3 დღიანი იქნება.
ტრენინგებზე მოსახვედრად ინდმეწარმეებმა შესაბამისი რეგისტრაცია უნდა გაიარონ. ამ დროისთვის ლექციების მოსმენის სურვილი 5 ათასზე მეტმა მეწარმემ გამოთქვა.
