აჭარის უმაღლესი საბჭო ახალი საკანონმდებლო ინიციატივით გამოდის, რომელსაც მალე ქვეყნის საკანონმდებლო ორგანოს წარუდგენს.
აჭარელი დეპუტაციის მიერ მომზადებული ინიციატივა "საჯარო რეესტრის შესახებ~ კანონში ცვლილებებისა და დამატებს ითვალისწინებს. აღნიშნული ინიციატივა აჭარის უმაღლესი საბჭოს კომისიების სხდომაზე უკვე განიხილეს.
კანონპროექტის მიმართ, რომლის მიზანს მაღალმთიანი რაიონების მოსახლეობის მიერ უძრავ ქონებაზე საკუთრების უფლების რეგისტრაციისას საჯარო რეესტრის მომსახურების საფასურისაგან განთავისუფლება და ქალაქ თბილისისა და ბათუმის ურბანული განვითარების გამო მიწებზე საკუთრების უფლების რეგისტრაციის საფასურის გადახდასთან დაკავშირებით წამოჭრილი პრობლემების მოგვარება წარმოადგენს, კომისიის წევრებს სხვადასხვა სახის წინადადებები და შენიშვნები ჰქონდათ. კერძოდ, არსებული რეალობიდან გამომდინარე, როგორც მაღალმთიანი რაიონების სოფლებში, ასევე ბარში, მოსახლეობის უმეტეს ნაწილს მართლზომიერ მფლობელობაში არსებული სასოფლო-სამეურნეო დანიშნულების მიწების საჯარო რეესტრში რეგისტრაციამდე პირველადი ტექნიკური დოკუმენტაციის შედგენა-მომზადებისას, უძრავი ქონების საკუთრების უფლების აღიარების რეგისტრაციის ხარჯებთან შედარებით გაცილებით ძვირი საფასურის გადახდა უხდება.
არსებული პრობლემის მოგვარებისა და საკითხის გადაწყვეტის მიზნით, კომისიამ მიზანშეწონილად მიიჩნია ცალკეულ მუნიციპალიტეტში, გამგეობასთან არსებული ინფრასტრუქტურისა და ეკონომიკის სამსახურის ბაზაზე შეიქმნას სპეციალისტების მობილური ჯგუფი. კომისია ზემოაღნიშნული წინადადებების გათვალისწინებით მხარს უჭერს აღნიშნული დადგენილების უმაღლესი საბჭოს პლენარულ სხდომაზე განხილვას.