2011 წელს აჭარის ავტონომიური რესპუბლიკის ჯანმრთელობისა და სოციალური დაცვის სამინისტროს დაფინანსება 4758,8 ათას ლარს შეადგენს, რაც 2010 წლის გეგმიურ 4403,5 ათას ლარს 8%-ით აღემატება.
აჭარის უმაღლესი საბჭოს ჯანმრთელობის დაცვისა და სოციალურ საკითხთა კომისიის თავმჯდომარის მიხეილ მჟავანაძის განმარტებით, სასურველია, ჯანმრთელობისა და სოციალური დაცვის პროგრამებს დაემატოს რამდენიმე პროგრამა და გაიზარდოს არსებული პროგრამების დაფინანსება. კომისია მხარს უჭერს კანონპროექტის პლენარულ სხდომაზე განხილვას.
უმაღლესი საბჭოს ჯანმრთელობის დაცვისა და სოციალურ საკითხთა სხდომაზე კომისიის წევრებმა აჭარის ავტონომიური რესპუბლიკის მთავრობის 2011-2014 წლების პრიორიტეტების დოკუმენტი განიხილეს. აღინიშნა, რომ წარმოდგენილი დოკუმენტით გათვალისწინებულია რესპუბლიკური ბიუჯეტის ძირითადი ეკონომიკური მაჩვენებლების დინამიკური ზრდა, მოსახლეობის დასაქმება და სოციალური ფონდის გაუმჯობესება. მნიშვნელოვან პრიორიტეტებად მიჩნეულია გარემოსდაცვითი, ტურიზმისა და კურორტების, საგზაო და სამელიორაციო სისტემების ინფრასტრუქტურის განვითარება, რაც შემდგომში რეგიონის ეკონომიკური აღმავლობის საფუძველი გახდება.