უახლოესი 3 წლის განმავლობაში მთავრობა ალკოჰოლიანი სასმელების სერთიფიცირებულ პარტიებზე საინსპექციო კონტროლს განხორციელებს. ამის შესახებ ნათქვამია დოკუმენტში "ქვეყნის ძირითადი მონაცემები და მიმართულებები 2011-2014 წლებისთვის".
დოკუმენტში აღნიშნულია, რომ რუსეთის მხრიდან განხორციელებული ემბარგოს გამო, საქართველოს მევენახეობა-მეღვინეობის დარგის წინაშე დადგა ახალი ამოცანა, რაც გულისხმობს სამომხმარებლო ბაზრის დივერსიფიკაციას და ქართული ღვინოპროდუქციის საექსპორტო მოცულობების გაზრდას. ეს კი, თავის მხრივ, უკავშირდება საერთაშორისო ბაზარზე ქართული პროდუქციის პოპულარიზაციისა და კონკურენტუნარიანობის გაზრდას, ასორტიმენტის გაფართოებას, სამომხმარებლო ბაზრის დაცვას დაბალხარისხოვანი და ფალსიფიცირებული პროდუქციისგან, ვაზის ნარგაობების განახლებასა და ჯიშობრივ გადახალისებას. სწორედ ამიტომ მთავრობას დაგეგმილი აქვს ქართული ღვინოპროდუქციის საერთაშორისო და ადგილობრივი დეგუსტაცია-კონკურსებისა და გამოფენების მოწყობა, თანამშრომლობა საერთაშორისო ექსპერტებთან, ალკოჰოლიანი სასმელების სერთიფიცირებულ პარტიებზე საინსპექციო კონტროლის განხორციელება.
პროექტის განხორციელებით სოფლის მეურნეობის სამინისტრო ელოდება სანედლეულო ბაზის განახლებასა და ჯიშობრივ გადახალისებას, ქართული ღვინის პოპულარიზაციას, მისი ხარისხისა და საექსპორტო პოტენციალის ამაღლებას; საექსპორტო პროდუქციის რაოდენობრივი და გეოგრაფიული არეალის გაზრდას; სამომხმარებლო ბაზრებზე უხარისხო და ფალსიფიცირებული პროდუქციის შემცირებას და მაღალმოსავლიანი, ძვირფასი ჯიშის ყურძნის ახლად გაშენებული ვენახების რაოდენობის ზრდას.
