2011 წლის ბიუჯეტში მთავრობისა და პრეზიდენტის სარეზერვო ფონდები 50-50 მილიონი ლარითაა განსაზღვრული. როგორც დეპუტატი გია ცაგარეიშვილი აცხადებს, 2009 წელს პრეზიდენტისა და მთავრობის სარეზერვო ფონდი 25-25 მილიონი ლარით იყო განსაზღვრული და წლის განმავლობაში მასში რამდენიმე ცვლილება შევიდა.
ცაგარეიშვილის განმარტებით, მისთვის გაუგებარია, რამ გამოიწვია სარეზერვო ფონდების ასეთი რადიკალური ზრდა მაშინ, როდესაც სარეზერვო ფონდების განკარგვა საზოგადოებისთვის გაუმჭვირვალეა.
"საკუთარი მაგალითის მიხედვით შემიძლია გითხრათ, რომ როგორც დეპუტატმა, რამდენჯერმე მოვითხოვე ინფორმაცია, სარეზერვო ფონდების თანხები რაში იხარჯებოდა. ინფორმაციის მისაღებად რამდენიმეთვიანი ლოდინია საჭირო, რაც ყოვლად მიუღებელია", - განაცხადა ცაგარეიშვილმა.
ცაგარეიშვილი აცხადებს, რომ ხელისუფლებას აქვს "ჭერი" და სარეზერვო ფონდების მოცულობა 60 მილიონს არ უნდა აღემატებოდეს.
ფინანსთა მინისტრის მოადგილე პაპუნა პეტრიაშვილი კი განმარტავს, რომ არსებული კანონმდებლობით მთავრობისა და პრეზიდენტის სარეზერვო ფონდების მოცულობა ორივე ერთად 140 მილიონს არ უდნა აღემატებოდეს.
"გეთანხმებით, რომ 2011 წლის ბიუჯეტში სარეზერვო ფონდების მოცულობა გაზრდილია, თუმცა გასულ წლებში სარეზერვო ფონდების რაოდენობა 2009 წლის გარდა საკმაოდ სოლიდური იყო. ის თანხა, რომელიც სარეზერვო ფონდებიდან იხარჯება, არის მიზანმიმართულად დახარჯული. იგი განიკარგება და იხარჯება სტიქიური უბედურების, რთველის და ისეთ ღონისძიებებზე, რისი დაფინანსებაც მნიშვნელოვანია", - განაცხადა პეტრიაშვილმა.
