ევროკავშირის დახმარებას საქართველო მიიღებს, როგორც ერთ-ერთი მოწინავე ქვეყანა - აცხადებს პარლამენტის ვიცე-სპიკერი გია ვოლსკი, რითაც ის ევროპული საბჭოს პრეზიდენტის შარლ მიშელის განცხადებას ეხმიანება.
მისი თქმით, საქართველოს აქვს საკმაოდ მყარი პოზიციები, როგორც ევროკავშირის ასოცირებულ წევრს, ასევე თავისუფალი ვაჭრობის მქონე და თავისუფალი გადაადგილების მქონე ქვეყანას.
"საქართველოს არასდროს ჰქონია ევროკავშირის ფორმატში ასეთი მძლავრი პოზიციები, როგორიც დღეს აქვს. რეფორმები მიმდინარეობს და ჩვენი პოზიცია გაცილებით უფრო მყარი იქნება, როცა 2024 წელს ევროკავშირის სრულუფლებიან წევრობაზე განაცხადა გავაკეთებთ. რასაკვირველია, ევროკავშირის საკმაოდ მნიშვნელოვანი დახმარება ზოგიერთი პოლიტიკური სუბიექტისთვის ძალიან მძიმე მოსასმენია და თუ ეს განხორციელდება იმ პოლიტიკური სუბიექტების პოზიცია საკმაოდ რთული იქნება, რომლებიც გუშინ ამბობდნენ, რომ საქართველო უნდა დაისაჯოს, რომ ქვეყანას უნდა დაუწესდეს სანქციები და ამ საკითხზე ინტერპრეტაცია მუდმივად მოხდება. ევროკავშირის დახმარებას საქართველო მიიღებს, როგორც ერთ-ერთი მოწინავე ქვეყანა და მოწინავე არა მხოლოდ რეგიონში", - განაცხადა ვოლსკიმ.
