"გურჯაანობა-2010" 10 ნოემბრის ნაცვლად 13 ნოემბერს გაიმართება.
ამის შესახებ გურჯაანის მუნიციპალიტეტის გამგეობაში განაცხადეს.
როგორც რადიო "ჰერეთი" იუწყება, ზეიმის თარიღის შეცვლის მიზეზი გურჯაანის ტერიტორიაზე მიმდინარე სარეაბილიტაციო სამუშაოებია.
"გურჯაანობას" ქალაქი გურჯაანი 80 წლის იუბილესაც იზეიმებს. დღესასწაული 13 ნოემბერს 12:00 საათზე დაიწყება და დღის განმავლობაში სხვადასხვა ღონისძიებებით გაგრძელდება.
"პაპას ბაღში" ხალხური რეწვის ნიმუშების გამოფენა-გაყიდვა გაიმართება. იქვე მოეწყობა გურჯაანის ღირსშესანიშნაობების ფოტოგამოფენა სახელწოდებით "გურჯაანი გუშინ და დღეს".
ქალაქის ცენტრში განთავსდება სცენა, სადაც ადგილობრივ შემსრულებლებთან ერთად ქართული ესტრადის ვარსკვლავებიც იმღერებენ. მოეწყობა შეჯიბრებები სპორტის სხვადასხვა სახეობებში, სადაც გამარჯვებულებს სიგელები და ფასიანი საჩუქრები გადაეცემათ.
ახტალის მიმდებარე ტერიტორიაზე განთავსდება ფაცხები, სადაც მოწვეულ სტუმრებს ტრადიციული ქართული კერძებით გაუმასპინძლდებიან.
