პრეზიდენტ სააკაშვილის შეფასებით, საქართველო მთელი მსოფლიოს ქვეყნებისთვის "მოდელი და მაგალითი გახდა".
პრეზიდენტ სააკაშვილის ეს პოზიცია, რომლითაც ქვეყნის პირველი პირი მსოფლიო ბანკის მიერ რამდენიმე დღის წინ გამოქვეყნებულ კვლევას კიდევ ერთხელ გამოეხმაურა, მედიას მისმა პრესსპიკერმა მანანა მანჯგალაძემ დღეს გამართულ ტრადიციულ ბრიფინგზე გააცნო.
"მსოფლიო ბანკის მიერ გამოქვეყნებული კვლევა, რომლითაც ბიზნესის კეთების სიმარტივის მიმართულებით ერთი ადგილით დავწინაურდით, აჩვენებს, რომ საქართველო დღემდე რჩება საქმიანი ადამიანებისა და ბიზნესწარმომადგენლებისთვის მიმზიდველ ქვეყნად. აქ განხორციელებული ყველა საინვესტიციო პროექტი ქვეყნის განვითარებისთვის წინ გადადგმული ნაბიჯია და თითოეული რამდენიმე სამუშაო ადგილის შექმნის ტოლფასია", - მიაჩნია პრეზიდენტს.
ამ კონტექსტში, ქვეყნის პირველი პირის აზრით, საქართველო მოდელი და მაგალითი გახდა არა მხოლოდ რეგიონისა და პოსტსაბჭოთა, არამედ მთელი მსოფლიოს ქვეყნებისთვის.
გარდა ამისა, პრეზიდენტის განმარტებით, ხელისუფლება კარგად აცნობიერებს, რომ საქართველოს მოსახლეობის ყველაზე მთავარი პრობლემა უმუშევრობაა და ამ მიმართულებით მუშაობის ტემპი არ შეუცლია.
"რაც შეიძლება მეტი სამუშაო ადგილის შექმნა, კვლავ მთავარ გამოწვევად რჩება".
