საარჩევნო გარემოს გაუმჯობესებასთან დაკავშირებით, ოპოზიციური პარტიები პარლამენტის თავმჯდომარისგან, დავით ბაქრაძისგან, ოფიციალურ მიწვევას ელოდებიან.
ამის შესახებ "ქრისტიან-დემოკრატიული მოძრაობის" წევრმა ლევან ვეფხვაძემ ჟურნალისტებს განუცხადა.
მისი თქმით, საარჩევნო გარემოს გაუმჯობესების საკითხებში ჩართული ყველა პარტია, "თავისუფალი დემოკრატების" ლიდერის ირაკლი ალასანიასა და დავით ბაქრაძის შეხვედრის შესახებ ინფორმირებულები იყვნენ.
"ჩვენ ბაქრაძეს გუშინ, 14:00 საათზე შევხვდით, ხოლო ალასანია 20:30 საათზე. დღეს სესიაზე უკვე ოფიციალურად ველოდებით, რომ პარლამენტის თავმჯდომარე განცხადებას გააკეთებს და კონსულტაციებზე მიგვიწვევს", - აღნიშნა ვეფხვაძემ.
მისივე თქმით, ჯერჯერობით უცნობია კონკრეტულად სად გაიმართება კონსულტაციები.
შეგახსენებთ, რომ პარლამენტის თავმჯდომარე დავით ბაქრაძე "ჩვენი საქართველო - თავისუფალი დემოკრატების" ლიდერს ირაკლი ალასანიას შეხვდა. შეხვედრაზე ბაქრაძემ და ალასანიამ საარჩევნო გარემოს გაუმჯობესებასთან დაკავშირებით ხელისუფლებასა და ოპოზიციას შორის მოლაპარაკებების დაწყების საკითხი განიხილეს.
ასევე, 8 ოპოზიციურმა პარტიამ საარჩევნო გარემოს გაუმჯობესების მიზნით, ხელისუფლებას მათ მიერ შემუშავებული ახალი კოდექსი შესთავაზა, რაზეც კონსულტაციებისთვის მზადყოფნა პარლამენტის თავმჯდომარემ უკვე განაცხადა.
ახალი კიდექსი "ეროვნული ფორუმის", "თავისუფალი დემოკრატების", "რესპუბლიკელების" "ახალი მემარჯვენეების", "კონსერვატორების" "ხალხის პარტიის" და ქრისტიან-დემოკრატების" წარმომადგენლების მიერ შემუშავდა.