საერთაშორისო დამკვირვებლების შეფასებით, აზერბაიჯანში ჩატარებული არჩევნები საერთაშორისო სტანდარტებს არ შეესაბამებოდა. ეუთოს შეფასებით, მიუხედავად იმისა, რომ აზერბაიჯანში საპარლამენტო არჩევნებმა მშვიდ ვითარებაში ჩაიარა და მასში მონაწილეობა ოპოზიციურმა პარტიებმაც მიიღეს, ეს მაინც არ ნიშნავს, იმას, რომ არჩევნები დემოკრატიული სტანდარტების შესაბამისი იყო.
ეუთოს სადამკვირვებლო მისიის თქმით, დარღვევები გამოვლინდა კენჭისყრის პროცესშიც:
"ჩვენ შეშფოთებას გამოვთქვავთ მიკერძოებული მედიის, ერთი პარტიის დომინანტობის და კენჭისყრის პროცესში გამოვლენილი დარღვევების გამო", - განაცხადა ეუთოს სადამკვირვებლო მისიის წარმომადგენელმა ოდრი გლოვერმა.
ეუთოს შეფასებას დაეთანხმა აშშ-ს სახელმწიფო დეპარტამენტი, რომელმაც საკუთარ განცხადებაში აღნიშნა, რომ აზერბაიჯანში ჩატარებული არჩევნები საერთაშორისო სტანდარტებს არ შეესაბამებოდა.
შეგახსენებთ, რომ აზერბაიჯანში საპარლამენტო არჩევნები 7 ნოემბერს ჩატარდა და მმართველმა პარტიამ გაიმარჯვა.
