შინაგან საქმეთა სამინისტროს სხვადასხვა დანაყოფის თანამშრომლების „COVID-19“-ის საწინააღმდეგო მასობრივი ვაქცინაციის პროცესი კვლავ აქტიურად მიმდინარეობს.
საქართველოს სასაზღვრო პოლიციის დეპარტამენტების თანამშრომლებს ვაქცინაცია „ჰუალინგის“ სავაჭრო ცენტრის ტერიტორიაზე არსებულ მასობრივი ვაქცინაციის ევროპული სტანდარტების ცენტრში ჩაუტარდათ.
ცენტრში გახსნილია აცრის 10 კაბინეტი, რომლებიც აღჭურვილია შესაბამისი სამედიცინო საშუალებებით, რაც სრულად უზრუნველყოფს ვაქცინაციის პროცესის და მისი შემდგომი პერიოდის მეთვალყურეობის უსაფრთხო გარემოში ჩატარებას.
დამატებითი უსაფრთხოების მიზნით, ვაქცინაციის ცენტრში ასევე ფუნქციონირებს შოკის დარბაზი, სრული აღჭურვილობითა და კვალიფიციური მედპერსონალით, მათ შორის ექიმ-რეანიმატოლოგებით.
შინაგან საქმეთა სამინისტროს თანამშრომლებს შეუძლიათ, კვირის ნებისმიერ დღეს, წინასწარი რეგისტრაციის გარეშე აიცრან, როგორც „სინოვაკის“, ასევე, „სინოფარმის“ ვაქცინით.
შინაგან საქმეთა სამინისტროს თანამშრომლების „COVID-19“-ის საწინააღმდეგო მასობრივი ვაქცინაციის პროცესი მთელი ქვეყნის მასშტაბით მიმდინარეობს. ამ ეტაპზე, სამინისტროს 14 ათასზე მეტი თანამშრომელი უკვე ვაქცინირებულია.