საქართველოში კორონავირუსის "დელტა პლუს" შტამის შემთხვევები გამოვლინდა. ამის შესახებ დაავადებათა კონტროლის ცენტრის დირექტორის მოადგილემ, პაატა იმნაძემ განაცხადა.
იმნაძის თქმით, ამ დროისთვის ქვეყანაში "დელტა პლუს" შტამის ორი შემთხვევაა გამოვლენილი.
"ვირუსის შემთხვევების დაახლოებით ნახევარი, უკვე დელტა შტამით არის გამოწვეული. მათ შორის ე.წ. დელტა პლუსი, რომელსაც აქვს ერთი დამატებითი მუტაცია, ისინი მსოფლიო ბაზაშიც ატვირთულია. ჩვენთან საქართველოში დელტა პლუსი დაფიქსირებულია", - განაცხადა იმნაძემ.
მანამდე დაავადებათა კონტროლის ცენტრის დირექტორი ამირან გამყრელიძე გამოეხმაურა გავრცელებულ ინფორმაციას იმასთან დაკავშირებით, თითქოს საქართველოში კორონავირუსის ახალი შტამი გამოვლინდა.
"არავითარი ქართული შტამი არ არის, ეს არის ჩვეულებრივი დელტა, ანუ ინდური შტამი, დელტა პლუსი ჰქვია, დელტა შტამის ქვეშტამი, - განაცხადა გამყრელიძემ.
