პრეზიდენტ მიხეილ სააკაშვილის შეფასებით, მსოფლიოს არც ერთი ქვეყნის მთავრობას არ განუხორციელებია იმდენი ეკონომიკური რეფორმა, რამდენიც საქართველოს მთავრობას. ამის შესახებ სააკაშვილმა "თავისუფალ უნივერსიტეტში" სტუდენტებსა და პროფესორ-მასწავლებლებთან შეხვედრის დროს განაცხადა.
"ორი დღის წინ გამოცხადდა, რომ ჩვენ გავხდით ჩემპიონები ეკონომიკური რეფორმების თვალსაზრისით. ბოლოს ჩვენ ვიყავით ჩემპიონები ძიუდოში, თავისუფალ ჭიდაობაში, მანამდე ქალთა შორის ჭადრაკში. ეს ნიშნავს, რომ არც ერთ სხვა ქვეყანას მსოფლიოში და არც ერთ მთავრობას არ გაუკეთებიაBიმდენი რეფორმა, რომ უკეთესი ეკონომიკური შესაძლებლობები მიეცა ხალხისთვის", - განაცხადა პრეზიდენტმა და დასძინა, რომ ამ თვალსაზრისით საქართველომ ძალიან დიდი პროგრესი განიცადა და ეს არც მთავრობის პიარია და არც ტყუილის გასაღების მცდელობა.
შეგახსენებთ, რომ ცოტა ხნის წინ, მსოფლიო ბანკმა კვლევა - "ბიზნესის წარმოება 2010"-ის შედეგები გამოაქვეყნა, სადაც რეიტინგში საქართველო მსოფლიოს 174 ქვეყანას შორის # 1 რეფორმატორად აღიარეს.