სურსათის უვნებლობის, ვეტერინარიისა და მცენარეთა დაცვის ეროვნული სამსახურის დედოფლისწყაროს სამმართველოს ინფორმაციით, შირაქში მღრღნელი რუხი ზაზუნელა გამრავლდა. როგორც კახეთის საინფორმაციო ცენტრს სამმართველოს უფროსმა მერაბ ალადაშვილმა განუცხადა, მღრღნელის გასანადგურებლად დიდი რაოდენობით წამალია საჭირო.
„დედოფლისწყაროს რაიონში რუხი ზაზუნელა წინა წლებშიც იყო, მაგრამ ამ რაოდენობით არ ყოფილა. ამიტომ მის მოსასპობად დიდი რაოდენობით წამალი და დოზის გაზრდაა საჭირო" - აღნიშნავს მერაბ ალადაშვილი.
ფერმერების თქმით, რუხ ზაზუნელასთან ერთად სასოფლო-სამეურნეო ნაკვეთებში დიდი რაოდენობით თაგვია, რაც ხორბლის ნათესებს განადგურებით ემუქრება. მათივე თქმით, თაგვის წამალი უხარისხოა და თუ ზამთარი დროულად არ დადგა და ყინვები არ იყო, შესაძლოა, მოსავალი საერთოდ ვერ მიიღონ.
