ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი კობა სუბელიანი იმერეთის გუბერნატორთან, ლაშა მაქაცარიასთან ერთად ზესტაფონში მცხოვრებ აფხაზეთიდან დევნილებს ესტუმრა. მინისტრმა გაზიფიცირებული საცხოვრებელი ობიექტები დაათავლიერა და აღნიშნა, რომ რეგიონებში დევნილთა განსახლება და საცხოვრებელი პირობების გაუმჯობესება გაგრძელდება.
ზესტაფონში, მაღლაკელიძის #5-ში და #11-ში აფხაზეთიდან დევნილი 130 ოჯახი ცხოვრობს. აღნიშნული ობიექტების გაზიფიცირება დასრულებულია. კომპანია „სოკარ ჯორჯიამ" ბუნებრივი აირის მრიცხველებიც დაამონტაჟა, გაკეთდა გამწოვი სარკმლებიც, რაც კომპანიას 70 000 ლარი დაუჯდა. კვალითის დასახლებაში ორივე ობიექტი სრულად რეაბილიტირებულია და უახლოეს მომავალში დევნილებს საკუთრებაში გადაეცემათ.
აფხაზეთიდან დევნილის, ნათელა სხილაძის თქმით, ძალიან კარგი საქმე გაკეთდა, რადგან ელექტროენერგია დაეზოგებათ და ბუნებრივ აირს გასათბობადაც გამოიყენებენ და საჭმლის მოსამზადებლადაც.
მინისტრმა კობა სუბელიანმა აღნიშნა, რომ დევნილები ისევე ღირსეულად იცხოვრებენ აფხაზეთში დაბრუნებამდე, როგორც დანარჩენი მოქალაქეები: „ხედავთ, რომ დღეს გაზი ავანთეთ, წლის ბოლოსთვის კი ამ ობიექტს დავუკანონებთ, დევნილების საკუთრება გახდება. რაც შეეხება გაზიფიცირებას, ყველა კომპაქტური ობიექტი მთელი რესპუბლიკის მასშტაბით გაზიფიცირებული იქნება. გაზი ყველა დევნილის ოჯახში შევა. აქ იგულისხმება კომპაქტური ცენტრები, რომელიც რემონტდება და დევნილებს საკუთრებაში ეძლევათ, რომ ადგილობრივი მოსახლეობისგან აღარაფრით განსხვავდებოდნენ."
იმერეთის გუბერნატორის ლაშა მაქაცარიას თქმით კი მსგავსი ვიზიტები ღონისძიებები ძალიან მნიშვნელოვანია დევნილებისათვის, რომ მათ სრულუფლებიან მოქალაქეებად იგძნონ თავი და კომფორტულ გარემოში იცხოვრონ.
