ლეიბორისტული პარტიის ლიდერი შალვა ნათელაშვილი "პირველი არხის" ეთერში აცხადებს, რომ საზოგადოება არ არის მზად, აიტანოს ლგბტ მარშები.
მისი თქმით, 5 ივლისის აქციაზე "არავითარი ლგბტ იქ არ დაზარალებულა და არც უნდა დაზარალებულიყო".
"მოდით, პირდაპირ ვთქვათ, რომ არავითარი ლგბტ იქ არ დაზარალებულა და არც უნდა დაზარალებულიყო. ის აქცია დაწყებული არც ყოფილა. ლგბტ ყოველ წელს აცხადებს, რომ უნდა ჩაატაროს მსვლელობა და მერე იმ მსვლელობას არ ატარებს. არ ატარებენ თუ ვერ ატარებენ, არ ვიცი, ეგ მაგათი საქმეა. 17 მაისიდან 17 მაისამდე გრანტებს ელოდებიან უცხოეთიდან, ამას ითვისებენ. იმედია, ამ ორგანიზაციის რიგით წევრებსაც აქვთ სოციალური შეღავათები.
აქვე მინდა აღვნიშნო, რომ საზოგადოება არ არის მზად, აიტანოს ლგბტ მარშები. აქედან გამომდინარე, ვფიქრობ, ეს საკითხი უნდა მოიხსნას და მათ უნდა გააგრძელონ მუშაობა თეორიულად, კონფერენციების დონეზე. ჩვენ დავიცავთ მათ უფლებებს ძალადობისგან და სხვა უკანონო ქმედებებისგან", - განაცხადა შალვა ნათელაშვილმა.