12-16 ნოემბერს, ვარშავაში ნატოს საპარლამენტო ასამბლეის სესია გაიმართება.
ამის შესახებ მედიას ინფორმაცია საქართველოს საგარეო საქმეთა მინისტრის მოადგილე ნინო კალანდაძემ, დღეს გამართულ ტრადიციულ ბრიფინგზე მიაწოდა.
მისივე განმარტებით, სესიაში მონაწილეობას 300-ზე მეტი დეპუტატი მიიღებს, მათ შორის ქართველი პარლამენტარებიც იქნებიან.
"აღნიშნული სესია ორი მიზეზით არის მნიშვნელოვანი: პირველი, რომ ლისაბონის სამიტის წინ ტარდება და მასზე საქართველოს საკითხზე რეზოლუციის მიღება იგეგმება და მეორე, რომ საქართველოს პარლამენტის თავმჯდომარე დავით ბაქრაძე სიტყვით გამოვა, რომლის ხედვებიც, იმედია, რეზოლუციაში აისახება", - განმარტა კალანდაძემ.
ნატოს საპარლამენტო ასამბლეის სესიაში მონაწილეობის მიღების მიზნით საქართველოს საპარლამენტო დელეგაცია, პარლამენტის თავმჯდომარე დავით ბაქრაძის ხელმძღვანელობით ვარშავაში 10 ნოემბერს გაემგზავრება.
