რობერტ გეიტსი ისრაელის პრემიერს არ ეთანხმება იმაში, რომ ირანის ბირთვული პროგრამის შეჩერების ერთადერთი საშუალება ქვეყანაზე შეიარაღებული თავდასხმის განხორციელებაა.
ამის შესახებ აშშ-ის თავდაცვის მინისტრმა ავსტრალიაში, ჟურნალისტებთან საუბარში განაცხადა.
მისი თქმით, ეკონომიკურ-პოლიტიკური სანქციები, რომლებიც ირანის წინააღმდეგ არის მიმართული, ამ ეტაპზე ამართლებს და იგი ვერ ხედავს კონფლიქტის სამხედრო გზით მოგვარების აუცილებლობას.
"ჩვენ ვიცით, რომ ისინი შეშფოთებულები არიან სანქციების შედეგებით. სანქციები უფრო მძიმე აღმოჩნდა მათთვის, ვიდრე ამას მოელოდნენ", - აღნიშნა გეიტსმა.
მანვე განაცხადა, რომ იგი ვერ დაეთანხმება ისრაელის პრემიერის ბენიამინ ნათანეაჰუს შეხედულებას, რომელიც მიიჩნევს, რომ ირანის ბირთვული პროგრამის შეჩერების ერთადერთი საშუალება ქვეყანაზე შეიარაღებული თავდასხმის განხორციელებაა.
"მე ვერ დავეთანმხები ბენიამინ ნათანეაჰუს. ჩვენ კვლავ გვჯერა, რომ პოლიტიკურ-ეკონომიკური სანქციები, მიმართული ირანის წინააღმდეგ საბოლოო ჯამში შედეგს გამოიღებს და ირანის ბირთვული პროგრამა შეწყდება", - განაცხადა გეიტსმა, თუმცა დასძინა, რომ როდესაც საქმე ირანს ეხება, მოვლენების რამდენიმე შესაძლო განვითარებას უნდა ელოდო და შესაბამისი სამოქმედო გეგმებიც წინასწარ უნდა გქონდეს მომზადებული.
ცნობისათვის: აშშ და ისრაელი ირანს მოუწოდებენ შეწყვიტოს ბირთვული პროგრამა, რომელიც მათი თქმით, ბირთვული იარაღის შექმნისათვის მიმდინარეობს. აღნიშნული მოთხოვნის შეუსრულებლობის გამო, მიმდინარე წლის ივნისში, გაეროს უშიშროების საბჭომ 1929-ე რეზოლუციით ირანს დამატებითი ეკონომიკური და პოლიტიკური სანქციები დაუწესა.
ირანმა არაერთგზის უარყო ბრალდება, ბირთვული იარაღის შექმნასთან დაკავშირებით და განაცხადა, რომ მისი ატომური პროგრამა სამოქალაქო ხასიათს ატარებს.
