ფრაქცია "ქართული ოცნების" თავმჯდომარე მამუკა მდინარაძის განცხადებით, საყოველთაოდ ცნობილია, რომ რუსეთის პრეზიდენტი პუტინი აფინანსებს ლგბტ თემსაც და რადიკალებსაც და შესაძლოა, საქართველოშიც რუსული სცენარი ლაგდება. ამის შესახებ მდინარაძემ "რუსთავი 2"-ის ეთერში განაცხადა.
მდინარაძის მტკიცებით, სახელმწიფო ყველა უმცირესობის მიმართ ტოლერანტულია.
"ყველას მიმართ, რომელი უმცირესობაც არ უნდა იყოს, განსაკუთრებით ხაზს ვუსვამ ამას, ჩვენ ვართ ტოლერანტულები, მაგრამ როდესაც ვიცით, რომ პროვოკაციული მიზნებია, როდესაც პუტინის მსგავსი რაღაც სქემები ლაგდება. პუტინი რასაც აკეთებს, ხომ ვიცით ყველამ? პუტინი აფინანსებს ლგბტ თემსაც, ეს არის გავრცელებული აზრი და აფინანსებს რადიკალებსაც.
ეს არის პუტინის მეთოდები, რომ ერთი მხრივაც ხელი შეუწყოს, ისინი საბოლოოდ არ ჩაკვდნენ ასე ვთქვათ და მეორე მხრივაც, ვიღაცამ არ ჩაკლას სხვა იდეა ვითომ კონსერვატიული. ეს უნდა დაგვილაგდეს საქართველოში? ამისკენ მივდივართ ჩვენ? სადაც ტოლერანტული განწყობაა რეალურად და ეს არის მათ შორის ტრადიციაც. ჩვენ ახლა პუტინის მსგავსი სვლები უნდა დაგვილაგდეს დაფაზე...
ჩვენ გვილაგდება საქართველოში რუსული სცენარი და ევროპული ეგიდით და დეკლარირებით, გვილაგდება რუსული სცენარი და ამას ცდილობენ, რომ "შეტენონ" ხელისუფლებას," - ამბობს მამუკა მდინარაძე.
