მინდა ყველას შევახსენო, რომ ძალადობა ხდება ყველგან და ყველა ქვეყანაში, - ამის შესახებ ირაკლი ღარიბაშვილმა მთავრობის სხდომის დაწყებამდე განაცხადა.
პრემიერ-მინისტრმა აღნიშნა, რომ მთავრობამ პარტნიორი სახელმწიფოების ელჩები წინასწარ გააფრთხილა იმ საფრთხის შესახებ, რომელსაც რუსთაველზე „ღირსების მარშის“ ჩატარება შეიცავდა.
„ევროპის შუაგულში, საფრანგეთში, დიდ ბრიტანეთში და არა მხოლოდ, გვახსოვს კვირების განმავლობაში განუწყვეტელი ძალადობრივი, აგრესიული მანიფესტაციები, სადაც ათობით და ასობით ადამიანი დაშავდა. უამრავი დაიღუპა და დასახიჩრდა. გვახსოვს ამერიკის შეერთებულ შტატებში თვეების განმავლობაში მიმდინარე აგრესიული ძალადობრივი დემონსტრაციები. ქალაქებში, სადაც მოხდა გადაწვა ავტომობილების, კერძო ქონების დაზიანება და ადამიანების დახოცვა პირდაპირ. ჩვენს ქვეყანაში, ჩვენ ეს რისკები წინასწარ შევაფასეთ. წინასწარ ვუთხარით, ვთქვით, რომ ეს არის დაუშვებელი. ჩვენ ლგბტ საზოგადოებასა და ჩვენი პარტნიორი სახელმწიფოების ელჩებს ვუთხარით, რომ ამ აღლუმის ჩატარება რუსთაველის პროსპექტზე შეიცავდა პროვოკაციულ ხასიათს და მისი ჩატარება იყო დაუშვებელი. შესაბამისად, მინდა ვთქვა, რომ სახელმწიფოში, სადაც ბუნებრივია ხდება ძალადობაც და კრიმინალიც, არ შეიძლება ამის განზოგადება. რა თქმა უნდა, ეს შეიძლება მოხდეს ნებისმიერ დროს, ნებისმიერ ქვეყანაში, მაგრამ ეს რა თქმა უნდა არ ნიშნავს იმას, რომ ჩვენ უნდა მივიღოთ ქაოსი და უწესრიგობა“, - განაცხადა ღარიბაშვილმა.