საქართველოს პარლამენტის შენობის წინ, "თავისუფალი აზრის სახლის" და მოძრაობა "7 ნოემბერის" ინიციატივით, საპროტესტო აქცია მიმდინარეობს. პარლამენტის შენობის წინ, დამონტაჟებულია ტრიბუნა, საიდანაც გამომსვლელები შეკრებილ აქციის მონაწილეებს მიმართავენ. აქცია 2007 წლის 7 ნოემბრის ამსახველი დოკუმენტური კადრების ჩვენებით დაიწყო.
აქციის წამყვანმა პაატა ბარათაშვილმა გაახმოვანა შეკრების ორგანიზატორების ჩანაფიქრი და აღნიშნა, რომ დღეს, 7 ნოემბერს საქართველოში "ღირსების წიგნი" იწერება. აქციის მონაწილეებს ორგანიზატორებმა დაურიგეს ფურცლები, სადაც მათ საკუთარი ხედვები და სურვილები უნდა ჩამაოაყალიბონ, თუ როგორ საქართველოში სურთ ცხოვრება. ამის შემდეგ კი, ბარათაშვილის განმარტებით, აღნიშნული ბუკლეტები დასკანედება და წიგნად გამოიცემა.
აქციაზე სიტყვით გამოსვლის დროს "დაიცავი საქართველოს" ლიდერი დავით მაღრაძე გამოვიდა ინიციატვით, რომ 7 ნოემბერს "ღირსების დღეს" ეწოდოს. მისი თქმით, 3 წლის წინ ქართველმა ხალხმა გამომაჟღავნა თავისი ღირსება, ხოლო ხელისუფლებამ - უღირსობა.
"ქართველი ხალხი სიმართლისთვის ბრძოლაში არ დაიღლება. ქართველებმა თავისი ღირსება უკვე გამოავლინეს 7 ნოემბერს, როცა ცარიელი ხელებით თავიანთი და მთლიანად საქართველოს ღირსება დაიცვეს. ხელისუფლებამ კი როგორც ხშირ შემთხვევებში ხდება ხოლმე, უღირსობა გამოამჟღავნა. დღევანდელ დღეს უნდა ეწოდოს ქართველი კაცის ღირსების დღე", - განაცხადა მაღრაძემ.
დღევანდელ აქციას შეურთდნენ შემდეგი პოლიტიკური ძალები: "ქართული პარტია" "თეთრები, "კონსერვატორები", ხალხის პარტია", "დემოკრატიული მოძრაობა", "თავისუფალი დემოკრატები", "ეროვნული ფორუმი", "ქართული დასი", "ქრისტიან-დემოკრატები", "ლეიბორისტები" და "რესპუბლიკელები". რაც შეეხება არასამთავრობო ორგანიზაციებს, მათი მხრიდან აქციაზე წარმოდგენილები არიან: "ყოფილი პოლიტპატიმრები ადამიანის უფლებებისათვის" "კანონი ხალხისთვის", "სოლიდარობა უკანონო პატიმრებს", "გადაარჩინე სიცოცხლე", საქართველოს ლეგიონი", "ადვოკატთა ასოციაცია", "სახალხო კრება", "გარემოვაჭრეთ ლიგა", "პედაგოგთა ასოციაცია" და "დევნილთა სამოქალაქო მოძრაობა".
მომიტინგეების ნაწილი ტროტუარს გადასცდა და გზაზე გადავიდნენ, თუმცა ამის გამო რუსთაველზე ავტომანქანების მოძრაობა არ შეფერხებულა.
