იაპონიის მინისტრთა კაბინეტის საქმეების მინისტრის პირველი მოადგილე იოსინორი სუემაცუ 7-8 ნოემბერს "ჩრდილოეთის ტერიტორიებზე" - ასე უწოდებს იაპონური მხარე კურილიის კუნძულების ჩრდილოეთ ნაწილს, ქალაქ ნემუროში კურილიის კუნძულების ყოფილ მაცხოვრებლებთან შეხვედრას გეგმავს.
მისი მივლინება იაპონიის ყველაზე ჩრდილო კუნძულ ჰოკაიდოზე, იაპონური მედიის ინფორმაციით, "მოწოდებულია იმისკენ, რომ განიმარტოს ქვეყნის ხელისუფლების დამოკიდებულება რუსეთის პრეზიდენტის მიერ კუნძულ კუნაშირზე განხორციელებულ ვიზიტზე".
იოსინორი სუემაცუს ჩასვლამდე კუნძულ ჰოკაიდოს გუბერნატორმა ხარუმი ტაკახასიმ განაცხადა, რომ იგი აპირებს მოუწოდოს იაპონიის ხელისუფლებას "უფრო გაბედულად დაიწყოს რუსეთთან არსებული ტერიტორიული პრობლემის მოგვარება".
მისივე თქმით, იგი პირდაპირ აპირებს ამის თქმას იაპონიის პრემიერ-მინისტრისათვის 15 ნოემბერს მასთან პირისპირ დაგეგმილი შეხვედრის დროს.
შეგახსენებთ, რომ იაპონიასა და რუსეთს შორის ურთიერთობები რუსეთის პრეზიდენტის დიმიტრი მედვედევის მიერ კურილიის კუნძულების მონახულების შემდეგ 1 ნოემბერს დაიძაბა. იაპონია კურილიის ოთხ კუნძულს თავის ტერიტორიად მიიჩნევს.
საპასუხოდ იაპონიამ მოსკოვიდან თავისი ელჩი გაიწვია და ჯერ ჯერობით უპასუხოდაა დარჩენილი კითხვა როდის დაბრუნდება იგი უკან. იაპონიამ ასევე კითხვის ნიშნის ქვეშ დააყენა იაპონიის პრემიერ-მინისტრისა და რუსეთის პრეზიდენტის მოსალოდნელი შეხვედრა.
ამასთან ერთად, რუსეთის მხრიდან უკვე გაკეთდა ოფიციალური განცხადება იმის შესახებ, რომ დიმიტრი მედვედევი კურილიის კუნძულების მონახულებას კიდევ ერთხელ გეგმავს.
თავის მხრივ, იაპონიამ ამ განცხადების გამო პროტესტი უკვე გამოთქვა და განაცხადა, რომ "ამის შემდეგ რუსეთის მიერ ამ მიმართულებით გადადგმული ნაბიჯების შესაბამისად იმოქმედებს.
