რუსეთის რეპუტაცია, საერთაშორისო დონეზე, არასოდეს იქნება ისეთი როგორის ხილვაც თავად რუსებს სურთ, მანამდე ვიდრე იგი სუვერენული ქვეყნის ოკუპაციას აგრძელებს და ეს მუდმივი პრობლემაა მსოფლიოს მრავალი ქვეყნისათვის და აშშ-სთვის, _ ეს განცხადება აშშ-ს სახელმწიფო მდივნის მოადგილე ფილიპ გორდონმა რადიო "თავისუფლებისთვის" მიცემულ ექსკლუზიურ ინტერვიუში გააკეთა.
ფილიპ გორდონი აცხადებს, რომ აშშ-ს საქართველოს ტერიტორიული მთლიანობის აღდგენის საკითხი დღესაც საერთაშორისო დღის წესრიგში უჭირავს და სწორედ ასე გაგრძელებას აპირებს მომავალშიც.
ამასთან ერთად, აშშ-ს სახელმწიფო მდივნის მოადგილე ასევე აცხადებს, რომ აშშ მხარს უჭერს საქართველოს ტერიტორიულ მთლიანობას და აგრძელებს მისი აღდგენისათვის მუშაობას საერთაშორისო მოლაპარაკებებზე.
"მიმაჩნია, რომ არის მნიშვნელოვანი საერთაშორისო ზეწოლა იმისათვის რათა ეს საკითხი გადაწყდეს. რუსეთის ურთიერთობები მთელს მსოფლიოში მრავალ ქვეყანასთან და არსებითად მისი რეპუტაცია არასოდეს არ იქნება ისეთი, როგორის ხილვაც თავად რუსებს უნდათ, მანამ ვიდრე, მსოფლიოს ქვეყნების უმრავლესობის აზრით, იგი სუვერენული ქვეყნის ოკუპაციას ახორციელებს და ეს მუდმივად იქნება პრობლემა მსოფლიოს მრავალი ქვეყნისათვის, ევროკავშირის მრავალი ქვეყნისა და რა თქმა უნდა აშშ-სათვის", _ აცხადებს გორდონი.
მისივე თქმით, მაშინ როდესაც, რუსეთმა აღიარა აფხაზეთისა და სამხრეთ ოსეთის დამოუკიდებლობა, მას შესაძლოა ჰქონოდა იმედები, რომ სხვა ქვეყნებიც ასე მოიქცეოდნენ _ "მაგრამ მათ ეს არ გააკეთეს", _ აღნიშნავს ის და განმარტავს, რომ აშშ-მა გააკეთა არჩევანი ითანამშრომლოს რუსეთთან იმ სფეროებში, სადაც მათი ინტერესები იკვეთება.
"ჩვენ გავაკეთეთ არჩევანი ვიაროთ წინ რუსეთთან ერთად იმ სფეროებში, სადაც საერთო ინტერესები გვაქვს", _ აცხადებს სახელმწიფო მდივნის მოადგილე და დასძენს, რომ რუსეთისა და აშშ-ს გაუცხოება და თანამშრომლობის შეწყვეტა არც აშშ-ს, არც რუსეთს და არც საქართველოს არ აწყობს.
"ეს ძალიან რთული საკითხია, რომელიც როგორც იქნა გადაწყდა. ჩვენ არ ვფიქრობთ, რომ ჩვენს ინტერესებშია ან რუსეთის ან საქართველოს ინტერესებშია ვთქვათ, რომ ჩვენ უარს ვაცხადებთ რუსეთთან საქმის დაჭერაზე, უარს ვაცხადებთ ვიპოვოთ მასთან შეხების წერტილები ან უარს ვაცხადებთ მასთან გავაფორმოთ რუსეთთან ხელშეკრულებები სხვა და სხვა სფეროებში მანამ ვიდრე საქართველოს საკითხი არ გადაწყდება. ამით კი ჩვენ წინ ვწევთ ამ საკითხს, რუსეთის ხელისუფლებასთან ორმხრივ საფუძველზე", _ აცხადებს გორდონი.
აშშ-ს სახელმწიფო მდივნის მოადგილე ასევე აღნიშნავს, რომ აშშ მხარს უჭერს საქართველოს საერთაშორისო დონეზე ჟენევაში გამართულ მოლაპარაკებებზე და ცდილობს ამ ქვეყანაში კვლავ დააბრუნოს ეუთო და სხვა არასამთავრობო საერთაშორისო ორგანიზაციები.
"ჟენევაში გამართული მოლაპარაკებები ფორუმი, რომელიც სპეციალურად შეიქმნა იმისათვის, რომ გადაწყდეს ომის შემდეგ დღის წესრიგში დამდგარი საკითხები. ჩვენ ძალიან აქტიურად ვმუშაობთ ამ მიმართულებით და ვცდილობთ მივიღოთ თანხმობა ეუთოს საერთაშორისო ორგანიზაციისა და სხვა არასამთავრობო ორგანიზაციების საქართველოში კვლავ დაბრუნების შესახებ", _ აცხადებს გორდონი და აღნიშნავს, რომ წარმატებული გამოდგა აშშ-ს მოწოდება მსოფლიო ქვეყნებისადმი არ აღიარონ სეპარატისტული აფხაზეთისა და ე.წ. სამხრეთ ოსეთის დამოუკიდებლობა.
"ჩვენ ასევე წარმატებით მოვუწოდეთ სხვა ქვეყნებს არ აღიარონ აფხაზეთისა და სამხრეთ ოსეთის დამოუკიდებლობა და დღემდე გვიჭირავს ეს საკითხი საერთაშორისო დღის წესრიგში", _ აცხადებს გორდონი.