სახალხო დამცველი კარანტინში მყოფი პატიმრის ჯანმრთელობის მდგომარეობის შესწავლას მოითხოვს. როგორც "ჯი-ეიჩ-ენს" სახალხო დამცველის აპარატიდან აცნობეს, კარანტინში მოთავსებულ ერთ-ერთ პატიმარ ვახტანგ სუბელიანს აღენიშნება სიყვითლე, ღვიძლის გადიდება და სხვა სინდრომები, რის გამოც მისი იზოლირება აუცილებელია.
"ვახტანგ სუბელიანს აქვს სიყვითლე, ღვიძლის გადიდება დაახლოებით 3 სმ-ით, შარდი - მოყავისფრო ფერის. პაციენტი უჩივის თავის ტკივილებს, მწარე გემოს, ზოგად სისუსტეს. ექსპერტების აზრით, ზუსტი დიაგნოზის დადგენამდე ამ მდგომარეობაში მყოფი პატიმრის იზოლირება აუცილებელია ეპიდემიის თავიდან აცილების მიზნით. გასათვალისწინებელია ის გარემოება, რომ პატიმარი იმყოფება დახურულ სივრცეში სხვა 26 პირთან ერთად და სარგებლობს საზიარო ჭურჭლით", - ნათქვამია სახალხო დამცველის აპარატის სპეციალურ განცხადებაში.
აღნიშნულ კონტექსტში, "საქართველოს სახალხო დამცველის შესახებ" საქართველოს ორგანული კანონის 21-ე მუხლის „ბ" ქვეპუნქტის თანახმად, სახალხო დამცველი რეკომენდაციით მიმართავს სასჯელაღსრულების, პრობაციისა და იურიდიული დახმარების საკითხთა მინისტრს, დაუყოვნებლივ მოხდეს პატიმარ ვახტანგ სუბელიანს განცალკევებით განთავსება #8 დაწესებულების სამედიცინო ნაწილში მისთვის აუცილებელი გამოკვლევების ჩატარების, ასევე, შესაძლო ეპიდემიის თავიდან აცილების მიზნით.
ასევე, სახალხო დამცველმა განმეორებით მიმართა რეკომენდაციით ხათუნა კალმახელიძის უწყებას დაუყოვნებლივ მიიღოს ყველა საჭირო ზომა გლდანის #8 დაწესებულების კარანტინში არსებული არაადამიანური და დამამცირებელი პირობების აღმოფხვრის მიზნით და კარანტინში ყოფნის დროს პატიმრებისთვის უზრუნველყოფილი იქნას საქართველოს პატიმრობის კოდექსით გათვალისწინებული ყველა უფლების განხორციელება.
გიორგი ტუღუშის აპარატის მტკიცებით, რეკომენდაციის მიუხედავად, გლდანის დაწესებულების კარანტინში არსებული პირობები არ გაუმჯობესებულა. N1 საკანში, სადაც 6 საწოლია, 27 პატიმარი იმყოფება. საკანში არსებული სივიწროვის გამო მათ დროის უმეტესი ნაწილის ფეხზე გატარება უწევთ. პატიმრებს არასაკმარისი რაოდენობით მიეწოდათ ჭურჭელი, რის გამოც საკვებისთვის და სასმელისთვის საზიარო ჭურჭელს იყენებენ. პატიმრებს არ აქვთ ყველაზე აუცილებელი ჰიგიენის ნივთებიც კი, მათ შორის, არც ტუალეტის ქაღალდი. ისინი ვერ სარგებლობენ გასეირნების უფლებით, არ ეძლევათ შხაპის მიღების საშუალება.
აღნიშნულ მდგომარეობას განსაკუთრებით ამძიმებს ის გარემოება, რომ კარანტინში მყოფ პატიმრებს არ ნახულობს ექიმი.
გლდანის N#8 დაწესებულების კარანტინს საქართველოს სახალხო დამცველის სპეციალური პრევენციული ჯგუფის წევრები, მათ შორის, სამედიცინო ექსპერტები 4-5 ნოემბერს სტუმრობდნენ.
